İsmayıllının gənc icra başçısı Nahid Bağırovun siftəsi korlandı. Yəqin özü də istəməzdi belə olsun. Ona aprelin 21-də elə bir “sürpriz” etdilər ki, çətin uzun müddət özünə gələ bilsin.
N.Bağırov nə korrupsiyada, nə vətəndaşa qarşı qanunsuzluqda ittiham edilərək cəzalandırıldı, sadəcə, xüsusi karantin rejimini pozubmuş.
Bu, gənc icra başçısının pandemiya dövrü ilə bağlı yaddaşından silinməz izlər buraxacaq. İndi başçı İsmayıllı camaatına çağırış edə bilməz ki, evdə qalın. Adama deyərlər, birinci özün nümunə ol!
Reportyor.info xəbər verir ki, sosial şəbəkələr N.Bağırovdan danışır. O, karantin rejimini pozmasına görə prezidentin tərəfindən töhmət alıb. Onun reputasiyasına ciddi bir zərbə oldu.
Məlumata görə, icra başçısı aprelin 18-də turizm sahəsi üzrə bir qrup sahibkarla İsmayıllının Qalacıq kәndindә yerləşən Qovğadar dağına sәyahәt edib.
Əsas mәqsәd dağda piyada turist marşrutu və onunla əlaqədar turizmin digər imkanlarını yerində dəyərləndirmək olub. Sadəcə, N.Bağırov karantin rejimi qaydalarına əməl etməyib.
Yeri gəlmişkən, ilk dəfədir ki, dövlət başçısı sərəncamla bir icra başçısına töhmət verir. Buna qədər hansısa məmur şəxsi işinə yazılmaqla töhmət almışdı. Amma onun elan edilməsi ilkdir.
Üstəlik, bu postda ilk təyinatı olan bir gənc kadrın belə cəzalandırılması ürəkağrıdıcıdır. N.Bağırov səriştəsiz və təcrübəsiz olduğunu göstərib.
Bu da İsmayıllı kimi həssas bir bölgə üçün ciddi hadisədir. 2013-cü ildə Ələkbərovları devirən bu yerin camaatına təyin olunan başçı gərək diqqətli, məsuliyyətli olsun, səhv buraxmasın…
Maraqlıdır ki, icra başçısına töhmət verməsi ilə bağlı sərəncam ismayilli-ih.gov.az saytına yerləşdirilməyib. Bu barədə vəkil Səməd Vəkilov məlumat verib:
“Prezidentin İsmayıllı İcra Hakimiyyətinin başçısı Nahid Bağırovla bağlı sərəncamı İsmayıllı Rayon İcra Hakimiyyətinin rəsmi saytına niyə qoyulmayıb?
İcra Hakimiyyətinin vəzifəli şəxsləri və sayta cavabdeh şəxslər bilmirlər ki, Prezidentin həmin rayona aid sərəncamı dərhal sayta qoyulmalıdır? Bu töhmət olsa belə”.
Reportyor.info xəbər verir ki, bundan sonra onun vəzifədə uzun müddət qalacağı gözlənilmir. N.Bağırov cəmi 40 gün idi ki, vəzifədəydi, töhmət aldı. Məsələ burasındadır ki, icra başçısı son addımı ilə məsuliyyətsizlik nümayiş etdirib.
İcra başçısı rayondakı karantin qaydalarına ciddi riayət etmək, bununla bağlı vətəndaşlara nümunə olmaq əvəzinə, qaydaları elə özü pozub.
Halbuki yerli icra orqanının rəhbəri başçılıq etdiyi rayonda istər qanun-qaydalara riayət, istərsə də digər hərəkətlərində sakinlərə nümunə olmalıdır. Özü də belə həssas dövrdə.
Məsələ burasındadır ki, dünya ölkələrini ağuşuna alan, bir sıra dövlətlərin gizli düşmən adlandırdıqları koronavirus pandemiyası şəraitində ölkəmizdə vəzifəsindən, cinsindən, siyasi mövqeyindən asılı olmayaraq hər bir vətəndaş karantin qaydalarına ciddi şəkildə riayət etməlidir.
Qeyd edək ki, prezident töhmət alan icra başçısını martın 6-da qəbul edəndə xəbərdarlıq etmişdi.
Sitat: “Qanun qarşısında hamı bərabərdir, heç kim toxunulmaz deyil, heç kimin heç bir xüsusi imtiyazları yoxdur, heç kimin keçmiş xidmətləri nəzərə alınmayacaq.
Hər kəs keçmiş xidmətlərə görə dövlətdən layiqli qiymət alıbdır. Bundan sonra əgər kimsə dövlət işində, xüsusilə icra başçısı vəzifəsində işləmək istəyirsə, bax, bu prinsiplər əsas olmalıdır” deyə, dövlət başçısı demişdi.
https://www.youtube.com/watch?v=UrzZnSuW7Wo&feature=emb_title
