İsmayıllıda dekabrın 31-də keçirilən yeni illə bağlı tədbirdə baş verən qanlı olayla bağlı məlumata Daxili İşlər Nazirliyi reaksiya verib. DİN-nin Mətbuat Xidmətinin Şəki regional qrupunun baş inspektoru, polis kapitanı Mahir Məsimov Reportyor.info-ya bildirib ki, dekabrın 31-də saat 23 radələrində Araz Hüseynovun (əvvəlki soyadı Şəmdinli olub) əlin çoxsaylı kəsilmiş yarası xəsarəti ilə xəstəxanaya müraciət etməsi barədə polisə məlumat daxil olub.
Onun sözlərinə görə, polis əməkdaşları tərəfindən hadisə yerinə, videokameralara baxış keçirilib, izahatlar alınıb və məhkəmə-tibbi ekspertizası təyin olunub. Araşdırma zamanı müəyyən edilib ki, həmin şəxs mərkəzin qadın əməkdaşı ilə aralarında yaranan mübahisə zəminində xidməti otağında olan dolabın şüşəsinə əli ilə zərbə endirib və nəticədə xəsarət alıb. “Araz Hüseynovun bıçaq xəsarətləri alması barədə iddialar isə əsassızdır” deyən Mahir Mənsimov əlavə edib ki, faktla bağlı İsmayıllı Rayon Polis Şöbəsinin Təhqiqat Bölməsində araşdırma aparılır.
Xatırladaq ki, jurnalist Zaur Qənbərovun yaydığı məlumata görə, Araz Hüseynovla işçiləri arasında dava olub.
