Oktyabrın 4-ü səhər saatlarında Rusiyanın lenta.ru portalı xəbər verirdi ki, Xankəndində atəş səsləri eşidilir.
Həmçinin, rus bloggerləri, reportyorları da Xankədindən video kadrlar yayaraq ermənilərin necə təlaş içində olduğunu və qaçdıqlarını təqdim edirlər.
Reportyor.info-nun Siyasət Şöbəsi yazır ki, Suqovuşan istiqamətinin tamamilə azad edilməsindən sonra Xankəndinə cəmi 25 kilometr qalır.
Azərbaycan ordusunun inamla irəliləməsi və əldə edilən uğurlar Xankəndinin gec-tez işğaldan azad olunacağına ümid yaradıb. Lakin biz daha çox hadisələrin geopolitik rakursuna nəzər yetirməliyik.
Dünyanın aparıcı ölkələrinin tutduğu mövqelər belə əsas yaradır ki, heç bir güclü dövlət Azərbaycanın haqq mübarizəsinə açıq şəkildə mane olmaq, müdaxilə etmək istəmir.
Bizim üçün ən böyük əngəl olan və 27 ildir erməni işğalına dəstək verən qüvvə – Rusiyanın bu proseslərə qarışmaması tarixi fürsət yaradıb.
Digər həmsədr ölkə ABŞ da Azərbaycana heç bir təzyiq göstərmir. Yalnız Fransa və şizofrenik prezidenti Makrondur ki, Ermənistana açıq dəstəyini ifadə edir, bu da bizi narahat etməməlidir.
İran faktoruna gəlincə, rəsmi Tehran ilk günlərdə başıpozuq səhvlərə yol verdi, rus silahının Ermənistana daşınmasına şərait yaratdı, amma həm daxildə baş qaldıran etirazlar, həm rəsmi Bakının reaksiyaları qonşu ölkənin ehtiyatlı davranmağa vadar elədi.
Beləliklə, Qarabağ uğrunda Azərbaycanın həyata keçirdiyi əks-hücum əməliyyatları ilə bağlı bizi maraqlandıran əsas dövlətlərin yanaşmalarını təhlil etdik: Rusiya qarışmır, ABŞ təzyiq etmir, Fransa “xoruzlanır”, İran ehtiyatlıdır və Azərbaycana dəstək bəyanatları verir.
Qərbə gəlincə, istər Avropa Şurası, istər Avropa Parlamenti, istərsə ATƏT olsun, habelə Almaniya, Böyük Britaniya kimi nəhəng dövlətlər heç biri Azərbaycan hakimiyyətinə təzyiq göstərmirlər.
Əksinə, ordumuzun həyata keçirdiyi əməliyyatların, torpaqlarımızın qeyd-şərtsiz azad olunmasının beynəlxalq konvensiyalara, qətnamələrə heç bir ziddi yoxdur.
Bu halda Ermənistan gözləmədiyi situasiya ilə üzləşib və iki ildir hakimiyyətə gələn Nikol Paşinyan ölkəsinin tarixinə qara ləkə kimi düşməkdədir.
Bu proseslər onun iqtidardan xalq qəzəbi ilə silinib atılmasını sürətləndirir. Bir sözlə, Ali baş komandan İlham Əliyev və müzəffər ordumuz tarix yazır, dünyanı mat qoymaqdayıq…
Artıq hadisələrin inkişaf istiqaməti, Türkiyənin mənəvi dəstəyi, ordumuzun zəfərləri, ən əsası xalqın əhval-ruhiyyəsi qarşısında heç bir yarımçıq atəşkəsdən, nəticəsiz sülhdən söhbət gedə bilməz.
Bu, Azərbaycanın da, hakimiyyətin də siyasi mövqelərinə ciddi zərbə vurmuş olacaq. Odur ki, prezident və ordumuz Qarabağın tam azadlığı olmadan dayanmayacaq. Ona görə Putin, Tramp, Makron, Ruhani, Merkel kimi dövlət başçılarının hansısa təzyiq mexanizmi işləmir…
Reportyor.info
İlqar Mətin
