Bu gün Müasir Müsavat Partiyasının (MMP) mərkəzi qərargahında Partiyanın rayon, şəhər təşkilatlarının, qadınlar, gənclər təşkilatlarının sədrləri ilə Siyasi Şuranın birgə geniş iclası keçirilib.
Bu barədə GÜNpress.az-a partiyanın mətbuat xidmətindən məlumat daxil olub. Bildirilib ki, iclasda ölkə yaranmış ictimai-siyasi vəziyyət, kənardan ölkəmizə qarşı aparılan məkrli planlar, Dağlıq Qarabağ ətrafında yaranmış son durum geniş şəkildə müzakirə edilib.
Qeyd olunub ki, radikal müxalifət qüvvələrinin “bir payız gecəsi sevdası” ilə sifariş əsasında həyata keçirdiyi planlar da müzakirə mövzusu olub. Bildirilib ki, istər daxildə, istər xaricdən Azərbaycan hakimiyyətinin, onun rəhbərinin ünvanına səslənən fikirlər, mənfur planlar ciddi müzakirə olunmalı və xüsusi qərarlar verilməlidir.
Bununla da Partiyanın rayon, şəhər təşkilatlarının, qadınlar, gənclər təşkilatlarının sədrlərinin israrlı tələbi ilə ölkə Prezidentinə qarşı aparılan ədalətsiz kampaniya və qarayaxmanın qarşısını almaq üçün konkret addımlar atılması üçün qərar verilib. Qeyd olunub ki, hakimiyyət daxilindən də bu qarayaxma kampaniyalarına dəstək olanlar bağlı da ciddi iş aparılmalıdır.
MMP Siyasi Şurasının 76 üzvünün 74-nün iştirak etdiyi toplantıda Prezident İlham Əliyevin Müasir Müsavat Partiyasının fəxri sədri seçilməsi ilə bağlı qərar qəbul edilib. Beləliklə, İlham Əliyev bu gündən MMP-in fəxri sədridir.
Məlumatda o da qeyd olunub ki, partiyanın rayon, şəhər təşkilatlarının, qadınlar, gənclər təşkilatları hesab edirlər ki, bundan sonra İlham Əliyevə qarşı istər daxildən, istər xaricdən olan hücumlara qarşı daha operativ və sərt mübarizə aparacaqlar.
Bundan sonra partiya dövlətçiliyin, Prezidentin və fəxrin sədrin qorunması yönümlü ciddi addımlar atılması ilə bağlı məxfi qərarlar verib.
