Son günlər Azərbaycan cəmiyyətində Hacı Şahinin dəfnindəki qələbəlik, onun cəmiyyət arasında nüfuzunun yüksək olması geniş müzakirə olunmaqdadır.
Milli Məclisin deputatı, Azərbaycan İlahiyyat İnstitutunun sabiq rektoru Ceyhun Məmmədov Modern.az-a açıqlamasında bu məsələdən danışıb.
“Qeyd etmək lazımdır ki, Hacı Şahinin cəmiyyətin müxtəlif təbəqələrinin nüfuzunu qazanmasının səbəblərindən biri onun əksər din xadimlərindən və bu sahədə çalışan insanlardan fərqli olaraq əlçatanlığı, sadəliyi və daim insanlar arasında olmasıdır. O davamlı olaraq Bakıda və bölgələrdə Vətən müharibəsi şəhidlərinin dəfn və yas mərasimlərində iştirak edirdi. Sosial şəbəkələrdə olduqca fəal idi”, – deyə millət vəkili bildirib .
C.Məmmədov son günlər daha çox müzakirə olunan digər məqama – Hacı Şahinin qəbrinin ziyarətgaha çevrilməsi məsələsinə də münasibət bildirib:
“Qeyd etmək lazımdır ki, dinimiz dini şəxsiyyətlərə pərəstişdə ifrata varmağın qəti əleyhinədir. İnsanların hər hansı şəxsə ehtiramla yanaşması normaldır. Ancaq bu onların müqəddəsləşdirilməsinə və bütləşdirilməsinə aparıb çıxarmamalıdır.
Eyni zamanda, hesab edirəm Hacı Şahinin qəbrinin ziyarətgaha çevriləcəyi və bura turların təşkil ediləcəyi ilə bağlı açıqlamalar həm də siyasi məqsəd daşıyır. Bu fikirlər məqsədli şəkildə dövriyyəyə bir sıra dairələr tərəfindən buraxılır. Dəfn yeri məlumdur, insanlar sərbəst şəkildə onun qəbrini ziyarət edə bilərlər. Bunun üçün xüsusi turların təşkilinə ehtiyac yoxdur.
Görünən odur ki, din sahəsində fəallıq bir müddət davam edəcək. Cərəyan edən proseslər ciddi təhlil olunmalı və operativ qərarlar qəbul edilməlidir. Proseslərin yalnız kənardan izlənilməsi sonrakı mərhələdə proseslərin idarə olunmasında ciddi çətinliklər yaradacaq”.
