2015-ci ilin oktyabrında həyata keçirilən xüsusi əməliyyat zamanı həbs edilən Milli Təhlükəsizlik Nazirliyinin (MTN) generalları haqda yeni xəbərlər var. Yada salaq ki, qurumda başlanan qəfil yoxlamalar nəticəsində Eldar Mahmudov nazir kreslosunu itirib, mərkəz, idarə və şöbələrinin əksər əməkdaşları istintaqa cəlb olunaraq müxtəlif müddətlərə azadlıqdan məhrum ediliblər. Əməliyyatdan 2 ay sonra prezident İlham Əliyev Dövlət Təhlükəsizliyi Xidmətinin və Azərbaycan Respublikasının Xarici Kəşfiyyat Xidmətinin yaradılması haqda fərman imzalamaqla, faktiki olaraq, MTN-in qurum olaraq ləğvinə imza atıb.
Həmin vaxt artıq MTN-in generalları da daxil olmaqla, xeyli əməkdaşı həbsə alınmışdı. Hazırda qurumun Əməliyyat-texniki idarəsinin sabiq rəisi, general-mayor Natəvan Mürvətova istisna olmaqla digər generalları – Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, Monitorinq Mərkəzinin rəisi, general-mayor Teymur Quliyev, MTN-in Antiterror Mərkəzinin sabiq rəisi, general-mayor Elçin Quliyev, MTN-in Transmilli İqtisadi Cinayətkarlıqla Mübarizə Baş İdarəsinin rəisi, general-mayor Sübahir Qurbanov müxtəlif müddətlərə azadlqıdan məhrum ediliblər. Natəvan Mürvətova bərəsində 5 il sınaq müddəti təyin edilməklə, şərti cəza verilib. Digər generallar barəsində də ittihamedici hökm və müddətli cəza hökmləri çıxarılıb. Hazırda sabiq MTN-çi generallar Bakının Binə qəsəbəsində yerləşən və “qırmızı zon” adlanan 9 saylı cəzaçəkmə müəssisəsində saxlanılırlar.
“MTN işi” başlanandan bir müddət sonra belə xəbərlər dolaşırdı ki, 9 saylı “zon”da Eldar Mahmudovun komanda üzvləri üçün ayrıca korpus tikilib. Onların məlumatlılıq dərəcəsi nəzərə alınaraq belə bir addım atıldığı da iddia edilirdi. Son məlumatlara görə bu ilin iyulun əvvəlində qeyd olunan müəssisəyə köçürülən Akif Çovdarov oradakı tibbi hissədə saxlanılır. Digər generallar və sabiq MTN-çilər də həmin müəssisədə dustaq həyatı yaşamaqdadırlar.
Xatırladaq ki, “MTN işi” üzrə ilk həbs olunan Antiterror Mərkəzinin rəis müavini İlqar Əliyev olmuşdu. O, rəsmi məlumatlara görə saxlanıldığı Bakı İstintaq Təcridxanasında intihar edib. Ümumilikdə isə iş üzrə Fərhad Atayev, Anar Şirəliyev, Eşqin Əliyev, Elşad Əzizov, Fizuli Əliyev, Vüsal Ələkbərov, Mirəziz Əsgərov, Mehman Abdullayev, Akif Əliyev, Anar Hüseynov, Səlim Məmmədov, Orxan Osmanov, Natiq Alıyev, Zaur Məmmədov, Azər Mehdiyev dustaq həyatı yaşayırlar.
