Türkiyədə mayın 14-də keçirilən Prezident və 28-ci Dövr parlament seçkilərindən sonra xarici liderlərdən prezident Rəcəb Tayyib Ərdoğana təbrik mesajları göndərilir. Gürcüstanın baş nazirliyindən verilən yazılı açıqlamaya görə, baş nazir İrakli Qaribaşvili prezident Rəcəb Tayyib Ərdoğana telefonla zəng edərək onu seçkilərin uğurlu təşkili və ilk turda səslərin çoxluğunu alması münasibətilə təbrik edib. “Baş nazir Qaribaşvili prezident Ərdoğanı seçkilərin uğurla keçirilməsi, birinci turda əldə edilən uğur və parlament seçkilərində hakim partiyanın aldığı səslərin əksəriyyətinə görə təbrik edib”, – məlumatda deyilir.
“Ərdoğanın şəxsi rolu böyükdür”
“Qaribaşvili vurğulayıb ki, Türkiyə-Gürcüstan strateji tərəfdaşlığının, eləcə də birgə regional layihələrin dəstəyi ilə davamlı və sabit regional inkişafın möhkəmləndirilməsində Ərdoğanın şəxsi rolu böyükdür”, – deyə məlumatda bildirilir. Qeyd olunub ki, Qaribaşvili də Ərdoğana seçkilərin ikinci turunda uğurlar arzulayıb.
