Dövlət Gömrük Komitəsi (DGK) Gürcüstandan idxal edilən və tərkibində zərərli orqanizmlərin aşkarlandığı 26042 kiloqram kartofla bağlı rəsmi açıqlama yayıb.
Reportyor.info bildirir ki, DGK-nın mətbuat və ictimaiyyətlə əlaqələr idarəsinin məlumatına görə, Gürcüstandan ölkəmizə idxal olunan kartof yükünə tətbiq edilən gömrük nəzarəti zamanı məhsulda zərərverici orqanizmlərin olmasına dair şübhələr yaranıb. Buna görə də müvafiq gömrük qurumları Qida Təhlükəsizliyi Agentliyinə müraciət edib. Agentliyin məhsuldan götürdüyü nümunələr üzərində aparılan laborator müayinələr nəticəsində kartofda gövdə nematodu aşkarlanıb. Müayinələrin nəticəsinə əsasən məhsulun geri qaytarılmasına qərar verilib. Lakin gömrük orqanlarından asılı olmayan səbəbdən – bayram və istirahət günləri ilə əlaqədar məhsulu idxal edən şirkətin bank əməliyyatlarında sənədləşmə işləri yubandığından və malın təkrar ixracı üçün lazım olan müvafiq sənədləri gömrük orqanlarına təqdim edə bilmədiyindən məhsulun geri göndərilməsi gecikib.
Dövlət Gömrük Komitəsi bildirir ki, Qida Təhlükəsizliyi Agentliyi tərəfindən tərkibində gövdə nematodu aşkarlanan 26042 kiloqram kartof hazırda gömrük nəzarəti altındadır və sərbəst dövriyyəyə buraxılmayıb. Qısa zaman ərzində müvafiq sənədləşmə işləri başa çatdırılaraq məhsulun geri göndərilməsi təmin olunacaq.
◀▶
* * *19:03
Ötən gün Azərbaycanın Qida Təhlükəsizliyi Agentliyi Gürcüstandan ölkəyə idxal edilən 26 ton kartofun zərərli orqanizmlərin aşkar edilməsinə görə geri qaytarıldığını açıqlayıb. Agentlikdən bildirilirdi ki, kartofdan götürülən nümunələrdə gövdə nematodu zərərli orqanizmləri aşkar ediblər.Aşkar olunan zərərli orqanizmin karantin tətbiq edilən gövdə nematodu olması ehtimal edilərək, məhsuldan nümunə götürülüb və Azərbaycan Qida Təhlükəsizliyi İnstitutunun müvafiq laboratoriyasına göndərilib.
Müayinələr nəticəsində məhsullarda karantin tətbiq edilən gövdə nematodunun olması öz təsdiqini tapıb. Aşkarlanan zərərli orqanizmin təhlükəliliyi nəzərə alınaraq, nəqliyyat vasitəsində olan 26 042 kiloqram kartof məhsulunun Gürcüstan Respublikasına qaytarılması üçün aidiyyəti üzrə müraciət edilib.
Lakin ötən gün noyabrın 9-da Gürcüstanın Maliyyə Nazirliyi bildirib ki, (gömrük xidməti bu nazirliyin tərkibinə daxildir) Azərbaycandan kartof partiyasının geri qaytarılması faktı qeydə alınmayıb.
“Hazırkı mərhələdə gömrük sərhədində kartofun geri qaytarılması faktı qeydə alınmayıb. Kartofun geri qaytarılması baş verərdisə yük təkrar fitosanitar nəzarətdən keçməli, məhsul partiysının identifikasiyası həyaat keçirilməli və onun labarator müayinələrinin nəticələri təqdim olunmalı idi. Kartofun geri qaytarılması barədə informasiya sonrakı araşdırma üçün Milli ərzaq agentliyinə göndəriləcək”-Maliyyə Nazirliyindən “Gürcüstan Xəbərləri” agentliyinə bildiriblər.
Nazirlikdən habelə deyiblər ki, Azərbaycana kartofun ixracı zamanı Gürcüstanın gömrük sərhədində müvafiq sitosanitar prosedurlar həyata keçirilib və sertifikat təqdim edilib. Kartof Gürcüstan tərəfinin sertifikatı ilə müşaiyət olunsa da Azərbaycan tərəfi hər halda labarator müayinələr üçün nümunələr götürməyi qərar alıb. Yoxlama göstərib ki, məhsul zərərli orqanizmlər daşıyır.
Kartofun gövdə nematodu dəyirmi qurdlardan olub, ölçüsü 0,72-1,44 mm-dir. Bitkinin bütün yeraltı (kökyumruları, kökümsovları) hissəsinə zərər verir. Növ çoxzonalılıq təşkil edir və mülayim iqlim qurşağına malik olan regionlarda yayılır. Sirayətlənmiş kökyumrularında yaş və yaxud quru çürümə olur ki, bu da anbarlarda saxlanılan zaman digər kökyumrularına da yayılır. Gövdə nematodunun zərərvericiliyi saxlanma zamanı, əsasən də temperatur dəyişikliyi olan zaman təzahür edir. Kiçik məsafələrə torpaq vasitəsilə yayıla bilən bu oqanizmlər suvarma zamanı su vasitəsilə də yayıla bilir.
