Ölkənin baş gündəmi və diqqəti Tovuz istiqamətindəki hadisələr olsa da, ermənidən fərqli olaraq, ikinci gözəgörünməz düşmən – koronavirusla müharibəmiz davam etməkdədir.
Azərbaycanın 16 şəhər və rayonunda COVİD-19 pandemiyası səbəbindən sərt karantn rejimi tətbiq olunub, yoluxma sayında isə azalma yoxdur, ölənlər gündəlik 6-9 nəfər arasında dəyişir.
Yalnız bir müsbət tendensiya müşahidə edilir: son günlərdə sağalanların statistikası yüksəlir, yoluxanların sayına çatmaqdadır. Elə iyulun 12-nə olan rəqəmlərə nəzər yetirsək, 520 yeni yoluxan, 486 sağalan var.
Daha bir gün əvvələ qayıdanda, yəni iyulun 11-də 531 nəfər yoluxub, 514 xəstə sağalaraq evinə buraxılıb. Bu isə sərt karantin rejimi tətbiq olunduğu bir aya yaxın müddətdə stabilləşmədən xəbər verir.
Bununla belə, üzücü gedişat koronavirus xəstələrini müalicə edən həkimlərin yoluxması ilə bağlıdır. İnfeksiyaya yoluxan həkimlərin sayı artır və elə bir gün yoxdur ki, hansısa bir doktor barəsində xəbər yayılmasın. Üstəlik, yoluxma sayında nisbi azalma belə müşahidə olunmur.
Sərt karantin rejiminin başa çatmasına təxminən 6 gün qalır və epidemiyanın yoluxma səviyyəsi ehtimal yaradır ki, daha bir həftə uzadıla bilər.
Lakin tibb üzrə professor Adil Qeybulla yuxarıda deyilənlərlə qətiyyən razılaşmır və onun “Yeni Müsavat”a bildirdiyinə görə, heç bir müsbət tendensiyadan söhbət gedə bilməz.
Doktor A.Qeybulla hesab edir ki, gündəlik açıqlanan rəqəmlər reallığı əks etdirmir: “Gündə iki mindən çox adam koronavirusa yoluxur. Sadəcə, həmin adamlar qeydiyyata düşmürlər, evdə müalicə olunurlar.
Yəni gündəlik açıqlanan rəsmi məlumatlar sırf stasionar qəbul olan xəstələrin siyahısıdr. Buna saxta rəqəm demək olmaz. Sadəcə, müraciət etməyən, xəbər verməyən və evdə özünü müalicə edən vətəndaşlar var”.
Professor qeyd etdi ki, vəziyyət kifayət qədər ciddidir və özümüzü aldatmayaq: “Sərt karantin rejimi ləğv olunmalıdır və bunun heç bir mənası yoxdur.
Bir tərəfdən sərt karantindir, digər tərəfdən insanlar avtobuslarda, marketlərdə karantini pozurlar. Bunun harası sərt karantin oldu?
Ona görə də insanlara əziyyət vermək lazım deyil, hamı sərbəst buraxılmalıdır və karantin davranışı gücləndirilməlidir. Yəni maska taxılması, dezinfeksiya, sosial məsafə tələblərinə nəzarət güclənməlidir”.
