Göyçay rayonunda 1986-cı il təvəllüdlü İldırım Vəliyev ailə münaqişəsi zəminində yaranan mübahisə zamanı həyat yoldaşı Günaya (ad-soyad şərtidir – red.) xəsarət yetirib.
Hadisə bu ilin fevralın 11-də rayonun kəndlərindən birində baş verib. İ. Vəliyev həmin gün saat 10 radələrində arvadı Günay ilə birgə yaşadıqları evdə olarkən mübahisə edib.
Günayın əvvəlcədən kredit götürmək üçün banka girov qoyulmuş qızıl-zinət əşyalarını geri əldə etmək üçün kredit borcunu bağlamasını ərindən tələb etməsi səbəbindən aralarında ailə münasibətləri zəminində mübahisə yaranıb.
Mübahisə zamanı ər arvadını yumruqları ilə iki dəfə sol gicgah və sol sifət nahiyələrindən qəsdən vurub. Ona müxtəlif dərəcəli bədən xəsarətləri yetirib.
Hadisəni törədən İ. Vəliyevin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə ifadə verən təqsirləndirilən şəxs ona elan olunmuş ittiham üzrə özünü təqsirli bilib. O, ifadəsində göstərib ki, Günayla təxminən 14 ildir rəsmi şəkildə evlidirlər və bir azyaşlı övladları var: “Zərərçəkmiş şəxs ilə evləndiyimiz gündən etibarən, mən və arvadım Göyçay
rayonunun kəndində yerləşən fərdi yaşayış evində yaşayırıq. Həmin ünvanda atam və anam da yaşayır. Zərərçəkmiş şəxs ilə evliliyimiz boyunca, ailədaxili bəzi mübahisələrimiz olub. Lakin arvadıma heç vaxt fiziki zorakılıq tətbiq etməmişəm”.
Təqsirləndirilən şəxs qeyd edib ki, təxminən 3-4 ay əvvəl Günayın öz razılığı ilə ona məxsus qızıl-zinət əşyalarını banka girov qoyaraq kredit götürüb: “Hazırda kredit vaxtında və gecikdirmədən ödəyirəm. Lakin bir müddət sonra Günay kreditin tez bir zamanda bağlanmasını və qızıl-zinət əşyalarının girovdan azad edilməsi ilə geri qaytarılmasını tələb etməyə başladı. Ona səbirli olmasını, krediti vaxtında bağlayacağımı bildirdim. Təxminən 10-15 gün əvvəl özümə məxsus avtomobilimi satdım və həmin pul ilə iş görərək gəlir əldə etmək niyyətində olmuşam. Lakin Günay həmin pul ilə krediti bağlamasını və qızıl-zinət əşyalarını girovdan azad etməsini istədim. Bu səbəbdən aramızda mübahisə baş verib”.
İ. Vəliyevin ifadəsinə görə, fevralın 11-də, saat 10 radələrində evdə yalnız onlar olarkən Günay yenidən qızıl zinət əşyalarının girovdan azad edilməsi məsələsini gündəmə gətirərək mübahisəyə başlayıb: “Günay çox danışan və məsələləri uzadaraq mübahisəyə səbəb olan bir şəxsdir. Ona avtomobilimi sataraq əldə etdiyim pul ilə iş gördüm, gəlir əldə etmək istədiyimi izah etməyə çalışsam da, Günay məni başa düşmədi və mübahisəsini davam etdirərək üzərimə qışqırdı. Günayın yüksək səslə danışması məni əsəbləşdirdi. Nəticədə Günaya sifət nahiyəsindən iki dəfə yumruqla vurdum. Bundan sonra Günay ağlayaraq evdən getdi. Sonradan onun barəmdə polisə şikayət etdiyini öyrəndim”.
Bu cinayət işinə Göyçay Rayon Məhkəməsində baxılıb. Məhkəmə təqsirləndirilən şəxsin zərərçəkmişlə barışmasını nəzərə alıb. Bu səbəbdən təqsirləndirilən şəxsin barəsində olan cinayət təqibinə xitam verilib. O, cinayət məsuliyyətindən azad edilib.
