“Milli Fədailər” Hərəkatı lideri Fuad Muradov demokratik.az-a müsahibə verib. O, qardaşı Rəhman Muradovun ittihamlarına münasibət bildirib.
Gənc hərəkat lideri son günlər baş verən qalmaqallı davranışları və qardaşının sərgilədiyi sərt mövqe barədə danışıb. F.Muradov deyib ki, qardaşı onun əzizidir və söylədikləri qarayaxmadır:
“Ondan absurd fikirlərinə görə heç incimirəm. Çünki biz “Fədailər” bu dövlətin və uca millətimizin işıqlı gələcəyi üçün gərəkirsə təkcə Əli Kərimovun üzərinə yox, xaricdən Azərbaycana və ali baş komandanınıza sınıq-salxaq barmağını yelləyən ünsürlərin də üstünə gedəcəyik.
Düz evlərinin önünə, düşüncəsiz beyinlərinin lap içinəcən irəliləyəcəyik. Bu, indi zamanın tələbidir, bu vətənpərvər “FƏDAİ”lərin kutsal haqq yoludur.
Qoy, qardaşımın məndən istəmədiyi məhz bu olsun ki, ondan inciməyim. Qardaşımdır, amma gərək özü addımlaya bilmədiyi müqəddəs siyasi yoldan məni çəkindirməyə girişməsin”.
Hərəkat lideri qeyd edib ki, atam Alikin oğluna və dəyərli qardaşıma siyasi düşüncəsinə görə hücum çəkmək fikrində deyil: “Yazdığı o qramatik səhvlərlə zəngin, eləcə də öz doğmasını publika qarşısında gözdənsalma statusunu oxuduğum andan bir daha başa düşdüm ki, bu ölkədə qardaşı qardaşdan parçala biləcək çox təhlükəli müxalif siyasi cərəyan hökm sürür.
Allah bu fitrətə yuvarlananların hamısının şəfalarını versin, nə deyim axı! Qardaşımın seçiminə sayqım olmalıdır və ondan da gözləntim eynisidir.
Yazdıqları tamamilə yalandır və təşkilatımızın adına yapışmayan bir qardaş iftirasıdır. Ona qoşulanlar da bunu yaxşı dərk edir.
Qardaşım məni nə qədər küçümsə də, o özü milli fədailər hərəkatınin fədakar lideri Fuad Muradovun sevimli qardaşı kimi insanların beyninə həkk olunacaq. Bizi fərqli siyasi düşüncə yox, doğmalıq, eyni qan bağlayır.
