Bildiyiniz kimi, “Xəzər-Qara dəniz-Avropa Yaşıl Enerji Dəhlizi” layihəsi Azərbaycan, Gürcüstan, Rumıniya və Macarıstan tərəfindən həyata keçirilir. Burada əsasən Azərbaycanda istehsal olunan 4 giqavat gücündə yaşıl enerjinin 2040-cı ilədək Avropa bazarlarına ixrac edilməsi nəzərdə tutulur. Layihəyə əsasən bunun üç mərhələdə – birinci fazanın 2032-ci, ikinci mərhələnin 2036-cı, üçüncü fazanın isə 2040-cı ildə həyata keçirilməsi nəzərdə tutulur.
Bunu Berlində “Xəzər dənizi-Qara dəniz Yaşıl Enerji Dəhlizi” ilə bağlı təqdimatla çıxış edən “Yaşıl Enerji Dəhlizi Enerji Şirkəti”nin baş direktoru Fərhad Məmmədov AZƏRTAC-a müsahibəsində deyib.
F.Məmmədov oktyabrda Avropa Elektrik Ötürücü Sistem Operatorları Şəbəkəsinin (ENTSO-E) növbəti Onillik Şəbəkə İnkişaf Planına (TYNDP) bu layihənin də daxil edilməsinin əhəmiyyətini xüsusi vurğulayıb. Qeyd edib ki, yaşıl enerji layihələri arasında ilk dəfə Azərbaycanın layihəsi Avropanın onillik inkişaf planında əksini tapıb.
Tədbirin Berlində keçirilməsinin əhəmiyyətinə toxunan F.Məmmədov bunun bir neçə məqsədə xidmət etdiyini bildirib: “İlk növbədə, bu layihənin texniki-iqtisadi əsaslandırılması yaxın aylarda başa çatdırılmalıdır. Bundan başqa, biz hazırda biznes modelləri üzərində işləyirik və yaşıl enerjimizin ixrac istiqamətlərini nəzərdən keçiririk. Layihənin Macarıstandan Avstriya və Almaniyanın Bavariya vilayətinə qədər uzadılması potensialını araşdırırıq və hazırda bunun üzərində işləyirik. Bir neçə gün ərzində keçirəcəyimiz görüşlərdə bu məsələləri müzakirə edəcəyik. Almaniya tərəfi bu məsələlərə böyük maraq göstərir. Təqdimat mərasimində bu marağın şahidi olduq, iştirakçılar müzakirələrdə fəal iştirak etdilər, suallar ünvanladılar. Bu baxımdan Azərbaycanın artıq yaşıl enerji istehsalçısı və ixracatçısı kimi tanınmasını görmək bizim üçün son dərəcə məmnunluq doğurur”.
