Ermənistanda ikinci Qarabağ müharibəsi zamanı itkin düşən hərbçilərin yaxınları ilə yanaşı, müharibə iştirakçıları da hökumətdən narazıdırlar.
Reportyor.info xəbər verir ki, bununla bağlı Ermənistan mətbuatında çoxsaylı şikayətlər daxil olub.
“Hraparak” nəşri belə şikayətlərdən birini araşdırıb.
“İkinci Qarabağ Müharibəsinin bitməsindən təxminən 4 ay keçdi. Lakin bu günə qədər müharibədə iştirak edən insanlar öz pullarını ala bilmirlər. Hər gün fərqli yerlərdə və fərqli insanlardan müharibə iştirakçıları üçün nəzərdə tutulmuş köçürmələrin həll edilmədiyini, Müdafiə Nazirliyinin gündəlik vədlərinin isə onsuz da əsəbləri gərilmiş insanları daha da gərginləşdirdiyini eşidirik. Belə nümunələrdən biri Eçmiədzin sakini Onik Sirekanyan və onun üç dostudur”.
Sirekanyan jurnalistlə söhbətində süründürməçiliyin pik həddə çatmasından gileylənib. 27 sentyabrdan könüllü kimi müharibəyə qatılan Sirekanyan 28 gün döyüş meydanında olduğunu iddia edib:
“Suqovuşana şəxsi maşınımla getdim. Maşınım orada sıradan çıxdı və sonradan onu öz maliyyə hesabıma gətirdim. 28 gün ərzində Suqovuşan və Şuşada döyüşmüşəm. Müdafiə Nazirliyi bizi pulun köçürüldüyü banka yönəldir, oradan isə yenidən nazirliyə qaytarırlar. Beləcə bank nazirliyə, nazirlik də banka geri qaytarmaqla süründürməklə məşğul olurlar. Məndə olan məlumata görə, 220 ilə 230 min dram arasında olan vəsait köçürmək lazımdır. Hərbi hissənin maliyyəçisi ilə də danışmışam. Pulumuz köçürülmür, mən isə heç yerdə işləmirəm. Dostlarıma da müharibədə iştirakla bağlı maliyyənin veriləcəyini söyləyirlər. Amma pulu istəyəndə onlara da konkret cavab gəlmir. Bu gün Müdafiə Nazirliyinə gedərək bir nəfərlə danışdım. Dedi ki, gün ərzində köçürüləcək. Bir daha pulun banka gəlmədiyini öyrəndim”.
Onik nazirlikdən onlara çatacaq pulu ala bilməyəcəkləri təqdirdə başqa addımlar atacaqlarını, etiraz aksiyası keçirəcəklərini söyləyib. (Azvision.az)
