44 günlük Qarabağ savaşında evi yararsız hala düşən Tərtər rayonunun Buruc kənd sakini Elşad Mustafayevin evi yararsız hala düşüb. Yerli rəhbərlik onun evini bərpa edəcəyinə söz versə də, 3 ildir bu vədə əməl etmir.
Bu barədə Reportyor.info-ya Elşad Mustafayevin özü bildirib.
Elşad Mustafayev özü də Qarabağ veteranıdır. O, Birinci Qarabağ savaşında Tərtərin özünümüdafiə batalyonunda Azərbaycanın bütövlüyü uğrunda savaşıb.
Bundan başqa, 11 fevral 1996-cı ilə qədər “Babək 44” batalyonunda və “N” saylı hərbi hissənin döyüş mövqelərində xidmət keçib.
Elşad Mustafayevin 3 azyaşlı övladı var.
Şikayətçi deyir ki, 44 günlük Qarabağ savaşında erməni silahlı qüvvələrinin Tərtərə atdığı mərmilər nəticəsində evinin bir hissəsi tamamilə dağılıb. “Vətən müharibəsi bitdikdən sonra dağılmış evlərə baxış keçiriləndə bizim də evə baxdılar. Evin bir hissəsinin tamamilə dağıldığını gördülər.
Daha sonra iki nəfər gəlib bizə 500 manat pul verdi ki, dağıntıları təmizlədin, evinizin layihəsi hazır olanda bərpa edəcəyik. O vaxtdan 3 il keçib hələ də evim bərpa edilməyib”, – deyə Elşad Mustafayev bildirib.
Qarabağ veteranı müvafiq qurumlardan bu məsələdə ona yardım edilməsini istəyir.
