Azərbaycanın Müzəffər, yenilməz ordusu Ali Baş Komandanımız İlham Əliyevin rəhbərliyi ilə öz əzəli-əbədi, doğma torpaqlarımızı erməni soyğunçularından təmizləyərək tarixi ədaləti bərpa etdi.
28 il namərd, acgöz, yurdsuz düşmən tapdağı altında qalaraq talan edilib yerlə yeksan edilən vətən torpaqlarımız 44 günlük Vətən müharibəsində işğalçılardan azad edildi.
28 il müddətində bu torpaqlarda heç bir quruculuq işləri görülməmişdi. Əksinə öz yurd-yuvalarından qaçqın düşmüş yerli sakinlərin evləri talan edilib, yerlə yeksan edilmişdi. Azərbaycan xalqının tarixini, etnoqrafiyasını özündə əks etdirən tarixi abidələr uçurulmuş, eksponatlar vandallar tərəfindən mənimsənilmişdir. Yeraltı, yerüstü sərvətləri talan edilmişdir.
Əsası Qarabağ xanlığının banisi Pənahəli xan tərəfindən qoyulmuş Şuşa şəhəri Molla Pənah Vaqifdən başlayaraq ədəbiyyatın mərkəzi olmuşdu. Şuşa dahi bəstəkar Üzeyir Hacıbəyovun, Xurşidbanu Natəvanın, Bülbülün, Rəşid Behbudovun doğulub boya –başa çatdığı doğma diyar olub. Onların heykəlləri belə talançılar tərəfindən güllələnib və oğurlanmışdı.
Ermənilər özləri zəbt etdikləri torpaqlardan çıxarılarkən evləri, meşələri yandırmaqla bütün dünyaya bir daha bu torpaqların həqiqi sahibi olmadıqlarını sübut etdilər.
Ali Baş Komandanımız, Azərbaycan Ordusu bütün dünyaya sübut etdi ki, müharibəni, haqq ədaləti təkcə silahla deyil, güclü siyasətlə, bacarıqla, insan zehni ilə eyni zamanda dürüstlüklə qazanmaq olar.
Bu müharibə bizə dost olan və əks mövqedə olan qüvvələri üzə çıxartdı, bir daha tanıtdı. Qardaş Türkiyə haqq savaşımızın ilk günündən bizə mənəvi dəstək oldu. Hər an yanımızda olacağını söylədi. Bu dəstək Azərbaycan xalqını daha da ruhlandırdı, Qələbəyə inamını artırdı.
1918-ci ildə erməni daşnaqları zaman-zaman olduğu kimi, öz havadarlarının köməyinə arxalanaraq Azərbaycana hücum etmişdilər. Yüzlərlə dinc sakinə, qadına, uşağa işgəncə verərək qətlə yetirmişlər. Erməni daşnakları Bakını ələ keçirməyə də çalışmışlar.
İyun ayının 4-də Müstəqil Azərbaycan Hökuməti ilə Osmanlı dövləti arasında “Qarşılıqlı yardım və dostluq haqqında” müqavilə imzalanmışdı. Bu müqavilə əsasında Osmanlı hökuməti Azərbaycana hərbi yardım göstərməyi öhdəsinə götürmüşdü.
Qafqaz İslam Ordusu Nuru Paşanın rəhbərliyi ilə Bakını işğaldan azad etmişdi. Bakı şəhəri uğrunda gedən döyüşlərdə yüzlərlə 1000-lərlə türk əsgəri və zabiti həlak oldu. Azərbaycan xalqı onları həmişə ehtiramla yad edir.
Bu qırğında 12 mindən artıq türk-azərbaycanlı erməni cinayətkarları tərəfindən qətlə yetirilib.
Bəli, türkün türkdən başqa dostu yoxdur. Türk isə böyük və çoxdur. Türkiyə hökuməti, türk xalqı bu gün də Azərbaycanın yanındadır. Elə 20-ci əsrin əvvələrində Türkiyənin böyük tarixi şəxsiyyəti Mustafa Kamal Atatürkün dediyi kimi: “Azərbaycanın kədəri bizim kədərimiz, sevinci bizim sevincimizdir”.
Bu gün də bu əbədi dostluq, qardaşlıq davam edir və daim davam edəcək, zamanla daha da güclənəcək, möhkəmlənəcək.
Ümummilli Liderimiz də demişdir ki, biz bir millət, iki dövlətik.
Azərbaycan və Türkiyə bu gün də bir yerdədir, bütün dünya ölkələrinə örnək olaraq bir yerdə yeni, xalqlarımızı işıqlı gələcəyə aparan yeni, sərfəli layihələr üzərində işləyir. Bir yerdə bu iki qardaş ölkə yeni tarix yazır.
Qarşıda duran ən prioritet məsələlərdən biri və ən vacibi də Zəngəzur dəhlizinin açılmasıdır.
Zəngilan dəhlizinin açılması ilə Avrasiyanın nəqliyyat şəbəkəsinə yeni yol əlavə olunacaqdır. Bu region ölkələri arasında ticarət və iqtisadi əlaqələrə müsbət təsir göstərəcək. Türkiyə əsas iqtisadi tərəfdaşlarından olan Azərbaycana quru yol ilə birbaşa çıxış əldə edəcək. Zəngəzur dəhlizi Türkiyə üçün Mərkəzi Avrasiyaya qapı rolunu oynayacaq. Ankaranın türk dünyası ilə iqtisadi əlaqələri gücləndirməsinə imkan verəcək. Bundan başqa bu gün Türkiyə-Qars-Naxçıvan dəmir yolu layihəsi üzərində çalışılır. Bu layihə Naxçıvanla Türkiyəni birləşdirəcək. Növbəti mərhələdə bu dəmir yolunun Zəngəzur dəhlizi vasitəsi ilə Azərbaycanın qərb bölgələri ilə birləşdiriləcək ki, bu da Bakı və Ankara arasında ikitərəfli ticarət əlaqələrinin inkişafına yeni təkan verəcək.
Zəngilan dəhlizi Rusiya üçün Cənub Qafqaz və qonşu ölkələrə yük daşımalarında əsas marşruta da çevrilə bilər. Rusiya qatarları Azərbaycan ərazisindən-Zəngilan dəhlizindən keçə, bununla da Ermənistan, Türkiyə, İran və Cənubi Asiya ölkələrinə istiqamətlənə bilər.
Zəngilan dəhlizinin işə düşməsi ilə iqtisadi əlaqələrin genişlənməsi təkcə iqtisadi mənfəətin qazanılması ilə nəticələnməyəcək, həm də regionun təhlükəsizliyinə, bölgədə sülhə töhfə verəcək.
Şəhla Ağbulud
