Qazax Dövlət Sosial-İqtisadi Kollecinin direktoru Elşad Quluyev MeydanTV-yə açıqlamasında bildirib ki, o vaxtı (söhbət 2016-cı ildən gedir) böyük sinif otaqlarını qızdırmaq üçün 2083 litr (2 tondan çox) dizel yanacağından istifadə edilib. Mövcud qaydalara görə isə 2004-cü ildən sobaların yandırılmasında dizeldən istifadə qadağandır.
Bunu saytımıza açıqlamasında adıçəkilən təhsil müəssisəsinin sabiq tədris işləri üzrə direktor müavini Nicat Göyüşov deyib. O bildirir ki, 07.12.2004-cü il tarixdə Təhsil Nazirliyi ilə razılaşdırılmış Azərbaycan Respublikası Daxili İşlər Nazirliyi Baş Dövlət Yanğın Təhlükəsizliyi Xidmətinin 21.12.2004-cü il tarixli, 142 nömrəli əmri ilə təsdiqlənən Təhsil Müəssisələrinin Bina və Qurğularının İstismarı Zamanı Yanğın Təhlükəsizliyi Qaydalarının 6.10.2 bəndində göstərilir ki, sobanın yandırılması üçün benzin, kerosin, dizel yanacağı və digər asan alışan və yanan mayelərdən istifadə etmək qadağandır.
Bu qanun pozuntusu, eyni zamanda ötən tədris ilində 7 nəfər tələbənin zəhərlənməsinə, vəziyyətlərinin ağırlaşdığı üçün xəstəxanaya düşmələrinə səbəb olmuşdu.
Nicat Göyüşov bu və daha çox faktı Təhsil Nazirliyinə təqdim etdiyini, lakin heç bir tədbir görülmədiyini də deyir.
Qeyd edək ki, internetdə Kollec direktoru Elşad Quluyevin keçmiş MTN rəhbəri Eldar Mahmudovun yaxın qohumu və vaxtında Qazax rayonundakı əsas adamı olduğu haqqında məlumatlar var.
Discussion about this post