Bakı Nəqliyyat Agentliyinin hər cür özbaşınalığı olmuşdu, amma paytaxtın mərkəzində ağac kəsib parklama yeri yaratması heç kimin ağlına gəlməmişdi. Ancaq bunu da etdi BNA… Ötən gün bütün respublika BNA tərəfindən Bülbül prospektində ağacın kəsilərək yerinin avtomobil dayanacağına çevrilməsindən danışdı. Reportyor.info bildirir ki, bu qanunsuzluqda birbaşa Bakı Şəhər İcra Hakimiyyəti ilə Bakı Nəqliyyat Agentliyi məsuliyyət daşısa da, ara yerdə Nəsimi rayon bələdiyyəsi 4 000 manat cərimələnib, sözügedən hər iki qurum isə cəzasız qalıb. Parklama yeri Kinometoqrafiya İttifaqının qarşısında olub. İttifaqın rəsmisi də təsdiqləyir ki, maşınların saxlanması üçün bu yerdə ağac kəsilib, sonra BŞİH və BNA parklanmanı təşkil edib. Amma sözügedən qurumlar etdiyi qanunsuzluğa görə heç bir məsuliyyət daşımayıblar, “günah keçisi” kimi Nəsimi bələdiyyəsi cərimələnib. Prezidentin meriyaya göstərişindən sonra parklanma ləğv olunub. Göründüyü kimi, BNA yenə də özbaşına hərəkətlərindən qalmır. Bu dəfə daha da irəli gedərək şəhərin ən mərkəzi yerlərindən birində qanunu pozub. Əslində, bu, cinayətdir. Paytaxtda yerli-yersiz, nahaq dayanma-durma cərimələri yazan BNA hələ bir bəhanə edir ki, biz şəhərdə nizam-intizam yaradırıq. Əgər budursa şəhərin parklanmasını təşkil etmək, deməli, BNA ağac kəsib yolu zəbt etməklə bunu həyata keçirirmiş. Buyurun, məsələnin Prezidentin diqqətinə çatması heç də BŞİH və onun tabeliyində olan BNA üçün yaxşı olmadı. Əslində bu faktdan sonra Eldar Əzizov və Vüsal Kərimli tənbeh olunmalıydı. Çünki dövlət başçısı bu qanunsuzluqdan xəbər tutmasaydı, hələ də orada parklama davam edəcək, ağac kəsimi cinayəti ört-basdır olunacaqdı. Əgər BŞİH və BNA səmimi olsaydılar, özləri vaxtında bu dərəbəyliyin qarşısını alardılar. Hələ bir üstəlik, günahı gah kimi İttifaqının üstünə yıxırlar, gah da Nəsimi bələdiyyəsi cərimələnir. Əcaib məmləkətdir…
