Müasir Müsavat Partiyasının sədri Hafiz Hacıyev İsa Qəmbərin Müsavat başqanı seçilməsinə münasibət bildirib.
O, Globalinfo.az-a açıqlamasında bir çox məqamlara toxunub.
Deyib ki, Müasir Müsavat Partiyası yarandıqdan sonra bir qrup əqidəli şəxs onun tərəfinə keçib. Partiya sədrinin sözlərinə görə, İsa Qəmbərin başqan vəzifəsinə qayıtması heç nəyi dəyişməyəcək: “Müsavat partiya deyil, ora bir qrup alverçilər toplaşıb. Arif Hacılının da vaxtında belə olub. Elə alverçi olaraq qalacaqlar”.
H.Hacıyev deyib ki, Müsavat Partiyasındakı bəlli şəxslər fikirləşir ki, Avropada Azərbaycana qarşı müəyyən sanksiyalar hazırlanır, bunların hakimiyyətə qayıtması mümkün olacaq: “Axı bu adamlar müəyyən yerlərdən dəstək alırlar. Mənə birləşməyi təklif etmişdilər. Amma mən onları 30 ildir silmişəm. Gedib, alverlərini etsinlər”.
“Allah Əbülfəz Elçibəyə rəhmət eləsin, hər zaman mənə deyərdi, “mənim heyfimi İsa Qəmbərdən almasanız, kişi deyilsiniz”. Elçibəy hakimiyyətinin devrilməsində İsa Qəmbərin müstəsna rolu olub. İkihakimiyyətlilik yaratdı, imkan vermədi düz-əməlli işləyək. Bunu hər kəs gözəl bilir. Onları bağışlamaq olmaz!” – deyə, o, bildirib.
H.Hacıyev Müsavatdan ona bir yerdə çalışmaq təklifi gəldiyini bildirib: “Lakin buna razı olmadım, olan da deyiləm. Mən sona qədər müstəqil fəaliyyət göstərəcəyəm. Barışıq olmayacaq!”.
“Müasir Müsavat Partiyasının adını dəyişməyi düşünürsünüzmü” sualına o, belə cavab verib: “Qəti belə fikrim yoxdur. Partiyamız mənim prezidentliyə namizədliyimi 4 dəfə irəli sürüb. Seçkilərdə kifayət qədər fəal iştirak etmiş biri, niyə partiyanın adını dəyişsin?! Müsavat Partiyasının adını dəyişib “Alverçilər Partiyası” etsinlər. Çünki o partiyanın Məhəmməd Əmin Rəsulzadə ideyaları ilə heç bir bağlılığı yoxdur. Bağlılığı olsa idi, Elçibəyin hakimiyyətini devirməzdilər, Əbülfəz Elçibəyə xəyanət etməzdilər!”.
