“Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı”nın təqaüdçüsü adını qazanmış gənclərlə Azərbaycan Dövlət Neft və Sənaye Universitetində orientasiya görüşü keçirilib.
Elm və Təhsil Nazirliyinin mətbu orqanı “Azərbaycan Müəllimi” qəzetində görüşlə bağlı dərc edilmiş müsahibəyə əsasən, Sənan Əliyev 2025/2026-cı tədris ili üçün magistratura pilləsi üzrə (LL.M.) Amerika Birləşmiş Ştatlarının “Columbia” universitetinin Hüquq fakültəsinə – “Columbia Law School”a qəbul olub.
“Columbia” universiteti hüquq ixtisası üzrə beynəlxalq reytinqlərdə ilk sıralarda qərarlaşıb.
Sənan Əliyev daha əvvəl ali məktəbə qəbul imtahanlarında yüksək nəticə göstərdiyinə görə Azərbaycan Respublikası Prezidentinin müvafiq Sərəncamı ilə Prezident təqaüdçüsü adına layiq görülüb.
Bakı Dövlət Universitetinin Hüquq fakültəsinin bakalavr və magistratura pillələrini fərqlənmə diplomu ilə başa vuran Sənan Əliyev həm Azərbaycan Respublikasında “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2028-ci illər üçün Dövlət Proqramı” çərçivəsində, həm də “Columbia” universiteti tərəfindən təqaüd almaq hüququ qazanıb.
O, eyni zamanda ABŞ-nin Berkli Kaliforniya və Çikaqo universitetlərindən də qəbul alıb.
Qeyd edək ki, Sənan Əliyev cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə sahəsində FATF (Maliyyə Tədbirləri üzrə İşçi Qrupu) və Avropa Şurasının MONEYVAL Komitəsinin eksperti olaraq Azərbaycan Respublikasını beynəlxalq təşkilatlarda təmsil edir.
