“Ağcabədidə 115 artezian quyusu batıb, işləmir”.
Bunu Milli Məclisin bu gün keçirilən iclasında deputat Aqil Abbas deyib.
Deputat bildirib ki, Meliorasiya və Su Təsərrüfatı Açıq Səhmdar Cəmiyyəti cəmi 11 artezian quyusunun təmirinə pul ayırıb: “Camaat deputatdan da, başçıdan da artezian istəyirlər. Mən başa sala bilmirəm ki, mən artezian quran deyiləm. Necə ola bilir ki, Meliorasiya və Su Təsərrüfatı Açıq Səhmdar Cəmiyyətində Əhmədzadənin vaxtında bu işlər vaxtında görülürdü, amma indi görülmür? Bu camaata əkib-biçməyə su lazımdır. Ölkədə su çatışmazlığı var idi. Qabaq Yaponiya Ağcabədidə bir-iki artezian quyusu vurmuşdu. Biz yenə Yaponiyaya müraciət edək? Gərək Yaponiya səfirinə müraciət edim ki, Ağcabədidə yenə artezian quyusu vursun, bu camaat kənddən köçüb getməsin?! Şəmkirin kəndlərində də belə problemlər var”.
Sədr Sahibə Qafarova da məsələyə reaksiya verib: “Şəmkiri mənə görə vurğulayırsınız? Bütün kəndlərdə bu cür problemlər var”.
Xatırladaq ki, Sahibə Qafarova 98 saylı Şəmkir şəhər seçki dairəsindən deputat seçilib.
