Rəsmi İrəvanın 12 iyul hərbi avantürasından sonra Ermənistan-Azərbaycan münaqişəsinidə yeni mərhələnin başlandığını söyləyə bilərik.
Reportyor.info xəbər verir ki, bu mərhələdə Bakının artıq təcavüzkarla öz dilində danışmağı prinsip olaraq qəbul etdiyi müşahidə edilir. Əslində Prezident İlham Əliyevin “Qarabağ Azərbaycandır və nida” bəyanatından sonra rəsmi Bakı “hücum diplomatiyası”na keçid almışdı. İstər danışıqlar prosesində, istərsə də hərbi müstəvidə işğalçı ölkəyə adekvat münasibətin sərgilənməsinə başlanılmışdı.
Söz yox ki, əvvəllər də Azərbaycan bütün müstəvilərdə özünün haqlı mövqeyini lazımi qaydada müdafiə edirdi. Lakin bu müdafiə siyasəti sülh danışıqlarının pozulmaması üçün təmkinlə aparılırdı. Amma Ermənistanın Baş naziri Nikol Paşinyanın avantürist bəyanatları, eyni zamanda işğalçı ölkənin hərbi təxribatları Bakının “ən yaxşı müdafiə hücumdur” prinsipilə davranmasını zərurətə çevirdi.
12 iyulda baş verənlər isə ritorikanın daha da sərtləşməsinə səbəb olub. İndi Bakı hətta ATƏT-in Minsk qrupunu imitasiyada ittiham edir, Ermənistanla əlaqələr quran ölkələri İrəvanla münasibətlərə yenidən baxmağa çağırır. Xüsusilə, Ermənistanla iqtisadi-siyasi əlaqələr quran müsəlman ölkələrinə konkret mesajlar verir. İlham Əliyevin bir neçə gün əvvəl səsləndirdiyi fikirləri xatırlatmaq yerinə düşər:
“Bəzən, bəzi müsəlman ölkələrinin dövlət başçıları Ermənistana rəsmi səfərlər edirlər. Əlbəttə ki, bu, bizi haqlı olaraq narahat edir. Bunu açıq şəkildə deyirik, həmrəylik sözdə yox, əməldə olmalıdır.
Müsəlman məscidlərini dağıdan Ermənistanla hansı əlaqələr ola bilər? Açın baxın internetdə, görün Ağdam məscidi nə gündədir, Şuşa məscidi nə gündədir, digər şəhərlərdəki məscidlər nə gündədir, onları söküblər”,
Göründüyü kimi dövlət başçısı səviyyəsində müsəlman ölkələrindən sözdə yox, əməldə həmrəylik tələb olunub. Azərbaycanın təcavüzə uğrayan tərəf olduğunu nəzərə alsaq, bu haqlı tələbdir.
Böyük Quruluş Partiyasının sədri, deputat Fazil Mustafa mövzunu Yenisabah.az-a şərh edərkən deyib ki, dünya ölkələri dini mənsubiyyətindən asılı olmayaraq Ermənistan-Azərbaycan münaqişəsində həqiqətin tərəfində olmalıdır. Konkret olaraq müsəlman ölkələrinə gəlincə, deputatın fikrincə, Azərbaycanın diplomatik korpusu ciddi iş aparılmalıdır:
“Ərəb ölkələrindən tutmuş digər müsəlman dövlətlərə qədər hamısı ilə çevik münasibətlərin qurulmasına çalışılmalıdır. Onların real dəstəyini qazanmaq əlbəttə ki, Azərbaycan üçün avantajdır.
Amma bir məqamı qeyd edim ki, bu məsələdə təkcə müsəlman ölkələrindən söhbət getmir. Əgər din amili öndə olsaydı, o zaman gərək İran Ermənistana dəstək verməsin. Nəzərə almaq lazımdır ki, Azərbaycanda kafaca İrana yaxın şəxslər var. Ermənistanın hərbi təcavüzü nəticəsində onların da qohumu, qardaşı şəhid ola bilər. Ən azı İran bunu nəzərə alaraq Ermənistana dəstək verməyə bilərdi. Amma dəstək verirsə, deməli, din amili, müsəlman birliyi məsələsi siyasi maraqların arxasına keçir.
Mənim fikrimcə, dini mənsubiyyətindən asılı olmayaraq Azərbaycanla səmimi şəkildə yaxınlıq edən bütün ölkələrlə bu məsələni müzakirə etmək olar”, – deyə Fazil Mustafa bildirib.
