Sumqayıt şəhər Corat qəsəbəsinin Liman və Nərimanov küçələrinin sakinləri icra başçısı Zakir Fərəcovla görüşə hazırlaşır. Bu barədə Reportyor.info-ya məlumat verən sakinlər bildirib ki, şikayətləri əraziyə qoyulan zibil qutuları ilə bağlıdır.
“Üfunət iyindən evdə otura bilmrik. Bu məsələ mediada da işıqlandırılıb. Ondan sonra Sumqayıt Şəhər İcra Hakimiyyəti, eyni zamansa qəsəbə icra nümayəndiliyi tədbir görüldüyünü bildirsə də, problem hələ də qalır. Yerli rəhbərıik iddia edir ki, ərazini təmiz saxlayır. Lakin biz bu iddianın əsassız olduğunu sübut edən fotoları sizə təqdim edirik, özünüz baxın. Hətta gəlib özünüz də şəxsən şahidi ola bilərsiniz. Oranı təmiz saxlamaq mümkün deyil. Axşam olan kimi küçə itləri daraşır zibil qutularına. Zibil ətrafa dağılır. Digər tərəfsən kəsilmiş heyvanların möhtəviyyatı ora atılır. Burda sakin var ki, övladının səhhətində problem var. Uşaq küçəyə çıxa bilmir. Antisanitariya baş alıb gedir. Zibil qutularının qoyulması üçün yer olsa da, nədənsə bu problem həll olunmur”, – sakinlər bildirir.
Sakinlər deyir ki, artıq icra başçısının qəbuluna yazılıblar: “Yəqin ki, yaxın günlərdə bizi qəbul edəcək və ümid edirik ki, nəhayət problem həllini tapacaq. Bu problemi həll etmək o qədər də çətin deyil. Zibil qutularının qoyulması üçün yer də var. Lakin bizim təklif etdiyimiz yerlə bağlı deyilir ki, yaxınlıqdakı məzarlıq zibillənəcək. Əslində isə zibil qutularının hazırki yeri məzarlığın zibillənməsinə səbəb olur. Bəzi sakinlər zibili birbaşa məzarlığa atır. Bununla bağlı foto-video sübutlar da var”.
