Yazıçı, tərcüməçi Zahid Sarıtorpaq Azərbaycan Yazıçılar Birliyinin üzvlüyündən imtina edib.
“Qafqazinfo” xəbər verir ki, 69 yaşlı şair bu barədə sosial şəbəkə hesabında paylaşım edib.
“AYB üzvlüyündən imtina edirəm. 37 ildir bu qurumun üzvü idim. Getməyim heç də üzvlükhaqqı ödəməklə bağlı deyil. O, cüzi məbləğdir, lazım bilsəydim, ödəyərdim. Səbəblər var, sadəcə, açıb-ağartmıram… Nə isə… Fikrimi ilk dəfə burdan bildirirəm: xoşca qalın, getdim…”, – deyə o yazıb.
Məsələ ilə bağlı “Qaynarinfo”ya danışan AYB sədri Anar Rzayev onun istefasının səbəbini bilmədiyini söyləyib: “Özündən soruşun. Ərizə verirlər, baxırıq, layiq olanlar sıralarımıza qəbul olunur. Kimsə çıxmaq istəsə, deyirik xoş gəldin. Çıxmaq istəyib, lap yaxşı, özü bilər, xoş getdi!”
A.Rzayevin qurumdan istefalara reaksiyası isə belə olub: “Elə bilməsinlər ki, Yazıçılar Birliyi bununla nəsə itirir, əsla!”
Qeyd edək ki, bir müddət öncə Azərbaycan Yazıçılar Birliyinə üzvlük dayandırılıb. Qurumdan isə bildirilib ki, üzvlüyə qəbul keçən ilin sonlarından dayandırılıb, lakin əvvəlki tarixdə müraciət edənlərin sənədlərinə baxılır. Qəbul komissiyası işləri AYB-nin 2027-ci ildə keçiriləcək qurultayına qədər dayandırılıb, səbəb isə müraciət çoxluğudur. Üzvlükhaqqını ödəməyənlər təlimata uyğun olaraq Birlikdən kənarlaşdırıla bilər.
