Sabiq millət vəkili Etibar Hüseynov Xırdalan şəhərində yaşıllıqların məhv edilməsi və Heydər Əliyevə edilmiş hörmətsizliklə bağlı status paylaşıb.
O, Abşeron rayonun rəhbərliyini Avropadan Azərbaycan hakimiyyətinə qarşı sərt fikirlər səsləndirən şəxslərlə müzakirə edib və xanım icra başçısı İradə Gülməmmədovanı onlardan daha təhlükəli adlandırıb.
E.Hüseynov bildirib ki, özü və bir sıra media qurumları Xırdalanda Heydər Əliyev parkının, prospektinin, hətta posterinin də dağıdılması ilə bağlı dəfələrlə məsələ qaldırıb, yazılar yazsa da, nəticə olmayıb: “İcra hakimiyyəti məsələyə bir dəfə də olsun reaksiya verməyib. Amma Xırdalanda deyil, Abşeronun künc-bucağında bir kasıb daş üstə daş qoyan kimi başçının xüsusi bandası peyda olub o tikilini darmadağın edir”.
Sabiq deputatın sözlərinə görə, “Birlik-7″ MTK şirkəti Xırdalanın mərkəzində mərhum prezident Heydər Əliyevin adını daşıyan prospektdə (bir-neçə yerində) yaşıllığın altını üstünə çevirib tikinti aparır. O qeyd edib ki, bu barədə mətbuatda da dəfələrlə yazılıb, lakin Abşeron RİH və aidiyyəti qurumlar narahat olmayıb: “İndi nə etməli? Gərəkdir ki, bunların da fotoları Orduxanla Məhəmmədin şəkilinin yanına vurulsun kı, bəlkə onda tərpənələr? Elə isə darıxmayın – onsuz da yerli sakinlər gec-tez bunu edəcək”.
Discussion about this post