Ötən gün tanınmış meyxanaçı Rəşad Dağlı (Rəşad Əmirov) qonşusunu qətlə yetirib. Hadisə Qaradağ rayonunda baş verib.
İlkin məlumata görə, Lökbatan dairəsində Rəşad Əmirovla qonşusu İskəndər Mehtiyev arasında mübahisə zəminində dava düşüb. R.Əmirov bıçaqla qonşusuna çoxsaylı zərbələr endirərək, onu qətlə yetirib.
Ölkə gündəminin əsas müzakirə mövzusuna çevrilən hadisə ilə bağlı müxtəlif iddialar səsləndirilir və qətl törətməsinə baxmayaraq, Rəşad Dağlıya dəstək nümayiş olunur.
Tanınmış meyxanaçının həbs olunması onu sevənlərlə yanaşı, sənət yoldaşlarını da məyus edib.
Bir çox tanınmış insanlar sosial şəbəkə hesablarında Rəşad Dağlı ilə bağlı paylaşım edərək, onun tezliklə azadlığa çıxmasına arzulayıblar.
Modern.az məşhurların paylaşımlarından bir neçəsini təqdim edir:
Manaf Ağayev Rəşad Dağlı ilə birgə fotosunu paylaşaraq yazıb: “Allah köməyin olsun, qardaş. Sən dəyərli sənətkar, hörmətli oğlansan. Allah tezliklə qapını açsın”.
Tanınmış prodüsser Tarix Əliyev ( Tolik) öz verilişində qonaq olan Rəşad Dağlının videosunu yayıb: “Rəhmətlik atam Rəşadın pərəstişkarı idi. Allah tez bir zamanda qapısını açsın. Balanın xeyir işində yenə əl qaldırıb oynayasan. Elə insanlar var ki, söyüş qəbul etmir, özünü idarə edə bilmir. Rəşad sənin hər yerdə hörmətin var. Meyxananın şahısan, bunu hamı da bilir”.
Rəşad Dağlının yaxın dostu olan meyxanaçı Balaəlinin paylaşımı da diqqət çəkib:
“Allah sənin köməyin olsun, sənə azadlığı nəsib etsin. Çox pisəm, çarəsizəm. Səninlə olan şəkli əzab çəkə-çəkə paylaşdım. Necə edim, neyləyim, hara gedim? Dolaşıb qalmışam. Əlimizdən nə gəlir, nə lazımdırsa, gücümüz çatana qədər yox, çatmayana qədər yanındayıq. Səbirli olaq, bizim dövlətimiz, millətimiz sənətkara dəyər verən, qayğı göstərəndir”.
Meyxanaçı Oqtay Kamilin R.Dağlı ilə bağlı paylaşımında deyilir: “Mən həmişə bu gün üçün qorxurdum. Allah qapını açsın”.
Məhbəs həyatı yaşayan tanınmış müğənni Fədayə Laçın: “Bir şair ömrü də belə getdi. Allah qapını açsın, Rəşad. Allah çətin işlərini asana çevirər. Dualarımızdasan, Xızının qartalı…İnsanda bəxt, tale yaxşı şeydir”.
Məşhur aktyor Anar Heybətov isə meyxanaçı ilə illər əvvəl çəkilmiş fotonu paylaşıb: “Allah şeytana lənət eləsin. İnşallah, Allah tezliklə qapını açsın, qardaşım”.
Meyxana sənətindən şou-biznesə keçid edən Pərviz Bülbülə də məlum hadisədən məyus olub:
“Ağlımın ucundan keçməzdi ki, səninlə paylaşdığım şəklin şərhinə “Allah fərəc versin, Rəşad” yazaram. Allah qapını açsın, şair. Hər ağızda bir “amin” var”.
Aparıcı Lalə Əlimuxtarova Rəşad Dağlı üçün dua etdiyini söyləyib:
“Rəşadı bir anlıq belə qızışdıran olsubsa, Allaha həvalə olsun, kimliyindən asılı olmayaraq. Gəlin, təsəlli tapaq. Allah etməmiş əksinə olsaydı, nə olardı? Rəşad aramızdan əbədiyyətə qovuşardı. Hamımız üzüntü içindəyik, amma şükür edək ki, o yaşayır və dua edək. Allah sənətkarın qapısını açsın, mənim meyxanaya başqa hörmətim var. Dualarım səninlədir dəyərli qardaşımız”.
Son günlər başı qalmaqallardan ayılmayan müğənni Rəqsanə isə öldürülən şəxsin ailəsinə başsağlığı verib: “Rəşad, Allah sənin qapını açsın, Allah sənə kömək olsun. Ölən insanın da ailəsinə səbr diləyirəm, Allah ona da rəhmət eləsin. Lənət şeytana, Rəşad. Sən yaxşı oğlansan”.
Sənət nümayəndələri ilə yanaşı, siyasətçilərdən də hadisəyə münasibət bildirilib. Belə ki, Ağ Partiya sədri Tural Abbaslı sosial şəbəkə hesabında “əsl qatillər narkotik tacirləridir! Allah qapını açsın, Rəşad!”, – deyə yazıb.
