Ötən gün İranın yeni Prezidenti Məsud Pezeşkian ilə Ermənistan Baş naziri Nikol Paşinyan arasında telefon danışığı baş tutub.
“AzPolitika” xəbər verir ki, İranın “Mehr News” nəşri tərəflər arasına müzakirə olunan məsələrlə bağlı məlumat yayıb.
Məlumatda İran prezidentinin beynəlxalq sərhədlərin toxunulmazlığını xüsusi olaraq vurğuladığı qeyd olunub.
“Ermənistan İranın qonşuları arasında mühüm mövqeyə malikdir və bu ölkə ilə əlaqələr İslam Respublikasının xarici siyasət sistemində çox önəmlidir. İranın Ermənistanla sərhədi qısa olsa da, ümid və dinc həyatın sərhədidir və bizim sizə münasibətdə prinsipial siyasətimiz toxunulmazdır. İran bütün ölkələrin ərazi bütövlüyünə hörmətlə yanaşır, ancaq biz beynəlxalq sərhədlərdə istənilən dəyişikliyin əleyhinəyik. Biz Ermənistan və Azərbaycan arasında sülh danışıqlarını dəstəkləyirik və bununla bağlı hər cür yardıma hazırıq”,-deyə Pezeşkian bildirib.
Qeyd olunub ki, Pezeşkian qarşılıqlı olaraq İranın Ermənistanla bağlı üzərinə götürdüyü öhdəliklərə sadiqliyini, eləcə də əlaqələri daha da inkişaf etdirməyə hazır olduğunu vurğulayıb.
