Xalqımızın 30 ildən artıq həsrəti sona çatdı. Azərbaycan öz gücü ilə özünün tarixi torpaqlarını erməni təcavüzkarlarından azad etdi. İşğal müddətində isə ATƏT-in Minsk Qrupu və BMT-nin verdiyi qərarlara Ermənistan tərəfindən əhəmiyyət verilmirdi. Onlar Azərbaycanın işğal altında saxladıqları ərazilərini darmadağın edir, yeraltı, yerüstü sərvətlərini talan edib xarici ölkələrə satırdılar. Dinc əhali vaxtaşırı atəşə tutulurdu. 28 il fəaliyyətdə olan ATƏT-in Minsk Qrupunun həmsədr ölkələri bu müddətdə Azərbaycana, eyni zamanda işğal edilmiş ərazilərimizə yüzlərlə səfər etmişlər, hamıya məlum səbəbdən isə bu səfərlər və onların hazırladıqları qətnamələr, bəyannamələr heç bir nəticə verməmişdir. Onu da qeyd edək ki, bu gün elə ATƏT-in Minsk Qrupu da bütün bu reallıqları qəbul edir.
Artıq bütün bunlara son qoyuldu. Azərbaycan bu münaqişəni Beynəlxalq təşkilatların vasitəsi ilə deyil, öz siyasəti, öz gücü ilə həll etdi. Bir ildən artıqdır ki, Azərbaycan azad edilmış torpaqlarda abadlıq-quruculuq işləri görür. Yeni məktəblər, xəstəxanalar, mədəniyyət obyektləri, inzibati binalar tikilir, yollar çəkilir, elektrik stansiyaları istifadəyə verilir.
Azərbaycan beynəlxalq təşkilatlarla fəal əməkdaşlığı davam etdirir və dünyanın aparıcı beynəlxalq təşkilatları rəsmi Bakı ilə razılaşır, ərazi bütövlüyümüzü qəbul edir. Bunun bariz nümunəsindən biri də budur ki, BMT-nin xətti ilə Şuşada Azərbaycanın BMT-yə üzvlüyünün 30 illiyinə həsr edilmiş tədbir keçirildi. Bu tədbirin keçirilməsi və məhz Şuşada baş tutması onu sübut edir ki, BMT Azərbaycanın ərazi bütövlüyünü tanıyır.
Azərbaycana, respublikamızın prezidenti cənab İlham Əliyevə böyük inamın, etibarın nəticəsidir ki, BMT-dən sonra ən böyük beynəlxalq təsisat olan Qoşulmama Hərəkatına dövlət başçımız sədr seçilib. Çox qürurverici haldır ki, bütün üzv dövlətlərin razılığı ilə cənab İlham Əliyevin sədrlik müddəti daha bir il də uzadılıb.
Qoşulmama Hərəkatı həm müharibədən əvvəl, həm müharibə vaxtı, həm də müharibə sona çatdıqdan sonra Azərbaycanla həmrəy olmuş və dəstəkləmişdir.
İslam Əməkdaşlıq Təşkilatı da müharibədən əvvəl və sonrakı dövrlərdə dəfələrlə Azərbaycanın mövqelərini əks etdirən qətnamələr qəbul etmişdir.
Təşkilatın xarici işlər nazirləri səviyyəsindəki toplantıda Azərbaycanın mövqeyini dəstəkləyən, o cümlədən ölkəmizin tarixi-dini abidələrinin ermənilər tərəfindən dağıdılmasına dair önəmli qərar-qətnamələr qəbul etmişdir.
Təşkilatın rəhbərliyi müharibə bitdikdən sonra da Azərbaycan Ordusunun erməni quldurlarının işğalından azad etdiyi ərazilərdə olmuş. Erməni vandallarının Azərbaycanın dini inanc yerlərini, məscidləri darmadağın etdiklərini, bu müqəddəs yerləri bir vaxt donuz tövləsi kimi işlətdiklərini öz gözləri ilə görmüşlər.
Artıq Ermənistanın müstəqil olması müşkül bir işdir. Türkiyə və Azərbaycanla münasibətləri normalaşdırmasa, Ermənistan dövləti irəli gedə bilməyəcək. Çünki bu gün demək olar ki, bütün dünya Azərbaycanın haqq işini dəstəkləyir. Azərbaycanın ərazi bütövlüyünü tanıyır.
Bu gün Azərbaycan ordu quruculuğu ilə məşğuldur. 44 gün ərzində aparılmış müharibənin hər anı təhlil edilir. Yeni, müasir silahlar, texnikalar alınır. Müharibədən sonra Komando qoşun növü yaradılmışdır.
Belə vəhşi, işğalçı qonşularla həmişə tam hazır və ayıq-sayıq olmaq lazımdır.
Azərbaycan Respublikasının Prezidenti cənab İlham Əliyev: “Ermənistanın özünün silah almağa pulu yoxdur, heç vaxt da olmayıb. İkinci Qarabağ müharibəsində Ermənistanın 4-5 milyard dollarlıq dəyərində hərbi texnikası Azərbaycan Ordusu tərəfindən məhv edilmişdir. Bu texnikanın bir hissəsi qənimət kimi götürülüb. Bir hissəsi isə Hərbi Qənimətlər Parkında nümayiş etdirilir. Əgər yenidən Ermənistanın silahlanmasına pul ayrılacaqsa, Azərbaycan bunu qeyri-dost addım kimi qiymətləndirəcək”.
Şəhla Ağbulud