Prezident İlham Əliyevin həyata keçirdiyi son islahatlar, xalq-prezident təmaslarının intensivləşməsi, ev-ev gəzməsi, əhalinin xeyrinə olan sosial yönümlü qərarlar, fərmanlar verilməsi, minimum əmək haqqının, müavinətlərin artırılması fonunda Laçın Rayon İcra Hakimiyyəti (RİH) başçısı Aqil Nəzərli məcburi köçkünlərin “dərisinə saman təpir”, onları dövlətdən narazı salır.
A.Nəzərli laçınlı əhalini hökumətin üstünə qaldırır, bu azmış kimi, onun zülmündən cana doyan dörd nəfəri əldə ağ bayraqla erməni işğalında olan Laçına getməyə sövq edir.
Bu barədə Reportyor.info-nun əldə etdiyi məlumata görə, A.Nəzərlinin özbaşınalıqlarından, vətəndaşlara “divan tutması”ndan bezar olmuş köçkünlər düşmən tapdağında olan doğma Laçına üz tutmağa cəhd ediblər.
Əldə etdiyimiz məlumatda deyilir ki, Laçının Vağazin kənd sakinləri – İsmayılov Əkbər Əli oğlu, İsmayılov Mamed Əli oğlu, İsmayılov Yusif Əli oğlu və doğuşdan fiziki qüsurlu olan İsmayılov Gündüz Yusif oğlu icra başçısının istibdadı, onları əzməsi, problemlərini həll etməməsi ucbatından əldə ağ bayraqla Laçına yürüş ediblər. Buna polis əməkdaşları mane olmağa çalışıb.
İşin mahiyyətindən keçməzdən əvvəl yazmaq yerinə düşər ki, dövlət başçısının son dövrlərdə islahatları sürətləndirməsi, özbaşınalıq, talançılıq edən, şikayətlər çox edilən məmurları vəzifəsindən azad etməsi, dövlətin sosial siyasətini gücləndirməsinə baxmayaraq, Laçının İH başçısı Aqil Nəzərli hakimiyyətin, ölkə başçısının sosial siyasi kursuna zidd gedərək rayonda məcburi köçkünlərin ayağa qalxmasına zəmin yaratmaqdadır.
Dörd köçkünün Laçına əldə bayraqla keçməyə cəhd göstərməsi buna sübutdur. Bu barədə video material əldə etmişik. Kadrlardan görünür ki, narazı laçınlılar başqa yol qalmadığını bildirirlər. Onların sözlərinə görə, A.Nəzərlinin əməllərindən prezidentin xəbəri yoxdur.
“Aqil Nəzərli deyir ki, sizin yeriniz Laçındır, ora gedin. Qoy bizi orda vursunlar. Prezidentin bu adamın başımıza açdığı oyunlardan, bizi əzməsindən xəbəri yoxdur. Biz heç bir dövlətdən sığınacaq istəmirik, doğma yurdumuz Laçınımıza gedirik”, – deyə videoda şikayətçilər söyləyirlər.
Birinci Qarabağ müharibəsi əlilləri olan adıçəkilən laçınlı qardaşlar və doğuşdan fiziki qüsurlu olan İsmayılov Gündüz prezidentə müraciətdə fərari və saxta diplomlu icra başçısı barədə ölçü götürülməsini xahiş ediblər.
Onlar heç yerdə işləmirlər, dolana bilmirlər. Həmçinin, ailə üzvlərindən kimsənin işləmədiyi qeyd edilir. Ağır vəziyyətdə yaşadıqlarını və bununla bağlı Aqil Nəzərlinin qəbulunda dəfələrlə olmaqlarına baxmayaraq heç bir köməklik edilmədiyini deyirlər.
Prezidentə və I vitse-prezident Mehriban xanıma müraciət edən laçınlılar A.Nəzərlinin laqeyd, bivec fəaliyyətindən boğaza yığılıblar. Prezidentin həyata keçirdiyi islahatların qarşılığında icra başçısı İ.Əliyevin göstərdiyi etimadı yerə vurur, camaatı saymır, problemləri dinləmir. Belə görünür ki, yola salınan məmurlar cərgəsində onun da yeri hazırdır.
Qardaşlardan Əkbər İsmayılovun sözlərinə görə, vətən uğrunda döyüşərək sağlamlıqlarını itiriblər. Laçın işğalda olmasaydı, bu vəziyyətə düşməzdilər, A.Nəzərli da əhaliyə “divan tutmazdı”.
Ə.İsmayılovun bildirib ki, hiddətlənən A.Nəzərli əlini Laçın istiqamətinə uzadaraq, birinci Qarabağ müharibəsi əlilləri olan qardaşlara “mənə görə döyüşməmisiniz, Laçına görə döyüşmüsünüz, gedin Laçına, orda problemlərinizi həll etsinlər.
Mən bu vəzifədə olmaq üçün milyonlarımdan keçmişəm, sizə görə prezident mənə heçnə eləməz” deyərək otağından qovub. Qardaşlar isə icra başçısının bu cavabından məyus olaraq kəfənlərini boyunlarına dolayaraq vətən istiqamətində hərəkət ediblər.
Reportyor.info-ya verilən məlumata görə, Ağdam tərəfdən cəbhə xəttinə çatanda Yusifin doğuşdan fiziki qüsurlu olan oğlunun halı pisləşir, Ağdam rayon təcili tibbi yardımı köməyə gəlir.
Buna baxmayaraq, qardaşlar yoluna davam edir. Lakin təmas xəttində aidiyyati orqanların əməkdaşları tərəfindən onların irəli getməsinə icazə verilməyib, Ağdam Rayon Polis Şöbəsinə gətirilib dindirildikdən sonra Laçın polisinə göndəriliblər.
A.Nəzərli isə məsələnin ört-basdır edilməsi, gündəmə gəlməməsi üçün təsir göstərməyə çalışıb. İsmayılovqardaşları geri qaytarıldıqdan sonra onlardan biri – Əkbər yenidən Laçın İH rəhbərinin qəbulunda olub, problemlərin həll edilmədiyini xatırladıb.
Amma yeni icra başçısı ona kimsəbata bilməz deyərək Qarabağ əlilini otağından qovub. Bu etinasızlıq, prezidentin siyasətinin əleyhinə fəaliyyət, köçkünləri və Qarabağ əlillərini qapıdan qovmaq, işsizlik problemini həll etməmək, ölkədə gedən islahatların ziddinə addım atmaq Aqil Nəzərlinin istefaya göndərilməsini zəruri edir.
Prezident onu bu vəzifəyə təyin edib ki, camaatla işləsin, şikayətlər olmasın. Üstəlik, söhbət erməni işğalında olan, qəhrəmanlar yetişdirən, şəhidlər verən Laçının əhalisindən gedir.
Amma ilin-günün bu vaxtında icra başçısı prezidentin tapşırıqlarını qulaqardı edərək, Qarabağ əlillərini aşağılayıb qapısından qovaraq onları Laçına keçməyə vadar edir, düşmən hərbçilərin əlinə əsir düşməyə sürükləyir.
Bu, biabırçılıqdır, hökumətə, prezidentə A.Nəzərlinin xəyanət xarakterli fəaliyyətidir. Onun borcudur ki, ölkə başçısı kimi ev-ev, kənd-kənd gəzib laçınlı köçkünlərin problemlərini eşitsin. Di gör ki, İH başçısını heç nə maraqlandırmır, vecinə almır.
Bunun nəticəsidir ki, çarəsiz insanlar kəfən geyinib, təslimçi ağ bayraq tutub Laçına keçməyə məcbur qalırlar.
A.Nəzərli unudur ki, bu məsələyə görə onun başı möhkəm ağrayacaq. Hətta yaxın vaxtlarda işindən azad olunması da istisna deyil. Artıq bu hadisənin yuxarıların diqqətinə çatdığını söyləmək olar.
İsmayılovlar dövlətdən, dövlətin rəhbərindən problemlərinin həllini, laçınlılar isə A.Nəzərlinin cəzalandırılmasını gözləyir. Söz prezidentindir…
Gülay
REPORTYOR.info
https://www.youtube.com/watch?v=eCVGhE0ovvg
