Hakim partiyanın rəsmi orqanı olan “Yeni Azərbaycan” qəzetinin baş redaktoru, deputat Hikmət Babaoğlu Prezident İlham Əliyevin sərəncamı əsasında mətbuat işçilərinin mənzil şəraitinin yaxşılaşdırılması məqsədilə tikilmiş binadan aldığı 3 otaqlı mənzili ərəblərə kirayə verib.
“AzPolitika.info”nun məlumatına görə, bu barədə Azərbaycan Yazıçılar Birliyinin üzvü, şair-publisist Elşad Baratın Hikmət Babaoğluna yazdığı “Açıq Məktub”da söhbət açılır. Elə həmin məktubda həm də belə bir məlumat verilir ki, bu deputatın Bakıda 18 mənzili var!
Elşad Barat deputata ironiya ilə yazdığı məktubunda bildirir: “Çox hörmətli Hikmət müəllim! Yazıb sizə bildirmək istəyirəm ki, bu gün təsadüfən yolum dövlətimizin imkansız, aztəminatlı ailələrə verdiyi jurnalistlər binasına düşdü. Binanın qarşısında ərəblərlə rastlaşdım. Mən uşaq olanda atam məni döyə-döyə ərəb dilini öyrədirdi ki, molla olum, camaatın ölüsünü götürüm. Molla olmadım, amma ərəb dilindən azdan-çoxdan yadımda qalıb deyə, jurnalistlər binasından çıxan ərəblərə salam verib, hal-əhval tutdum. Söhbət əsnasında öyrəndim ki, bu ərəblər sizin evinizdə qalır. Düzü, ərəblərə inanmadım. Xeyli araşdırmalar elədim və məlum oldu ki, ev həqiqətən də sizin adınızadır.
Hikmət müəllim, siz dəyərli insansız, bir dəfə üz-üzə yarım saat söhbət də etmişik, niyə bu qədər müddəti susmusuz? Niyə deməmisiz ki, o ev sizin yox, Elşad Baratındır? Axı, sizin təkcə Bakıda on səkkiz dənə eviniz var! Məncə siz orda evinizin olduğunu bilmirsiz, yoxsa bu haqsızlığa dözməzdiz, çünki siz ədalətli jurnalistsiz…”
Şair daha sonra xatırladır ki, bir dəfə iş üçün Hikmət Babaoğlunun qəbulunda olub. İndi çoxsaylı evlərindən birini ərəblərə kirayəyə verən baş redaktor ona 231 manatlıq iş təklif edib: “Hikmət müəllim, yadınızdadırsa bir dəfə bir dostumuz məni sizin yanınıza göndərmişdi. Üç, ya da dörd il öncə. Onda siz mənə 231 manatlıq iş təklif etmişdiz. Üstündən də demişdiz ki, bu pulun 60-70 manatı çıxılacaq. Hər ay əlinə 160-170 manat alacaqsan. Mən sizə xeyli dil tökdüm ki, ay Hikmət müəllim, başınıza dönüm, mən elə hər ay 200 manat kirayəyə pul verirəm, bu 160 manatla mən nə edəcəm? Siz də öz mübarək qaşlarınızı çatıb demişdiz ki, mən orasına qoşulmuram. Sizə qurban olum, ay Hikmət müəllim, bəs siz harasına qoşulursuz? Deyin, biz də orasında dayanaq da…”
Qeyd edək ki, jurnalistlərin mənzil şəraitinin yaxşılaşdırılması məqsədilə dövlət hesabına tikilmiş binadan 3 otaqlı ev alan Hikmət Babaoğlunu həqiqətən də media oliqarxlarından biri hesab etmək olar. Onun Bakıda və Azərbaycanın səfalı bölgələrində xeyli sayda ev və villasının, həmçinin şirkətlərinin olduğunu sübut edən faktlar var. Cəmi 10 il əvvəl mediaya gələn bu deputatın var-dövlətinin mənbəyi qaranlıq qalır.
Rasim ƏLİYEV
AzPolitika.info
