Bakı Nəqliyyat Agentliyi nə dövlət rəhbərliyinin, nə də paytaxt sakilərinin etimadını doğruldan bilən qurum oldu.
Reportyor.info-nun xəbərinə görə, BNA uğursuz bir struktur təsiri bağışlamaqdadır və bacarıqsızlığı özünü göstərir.
Bu müddət ərzində verilən vədlərin heç biri əməl olunmayıb: yeni parklanma yerlərinin təşkili, qanunsuz pul yığanlarla mübarizə, yol nişanlarının qurulmasının təkmilləşdirilməsi, dayanacaqların yaradılması, dayanma-durma ilə bağlı getdikcə pisləşən vəziyyətin tənzimlənməsi…
BNA Maliyyə Bazarlarına Nəzarət Palatası kimi öz sektorunda islahatlar, nizam-intizam üçün yaradılsa da, ümidləri doğrultmadı və bu qurumun ləğvi üçün bütün əsaslar var.
Hələ bu azmış kimi, Bakı Nəqliyyat Agentliyi 2020-ci ildə Bakıda piyadalar üçün 500 yeni yol nişanı quraşdırılmasında maxinasiyalara hazırlaşır.
Demə, bir yol nişanı dövlətə 1840 manata (1082 ABŞ dollarına) başa gələcək. Dövlət satınalma reyestrinə əsasən, müqavilə dekabrın 24-də “MG Construction” MMC-yə verilib.Müqavilənin ümumi dəyəri 920 min manatdır.
Şirkətin veb saytında (mgconstruction.az/shop-2/) onun istehsalında yol nişanlarının olması barədə məlumat yoxdur.
Halbuki, Almaniya kimi inkişaf etmiş, iqtisadiyyatı təkcə özünü yox, ona axın edən qaçqınları saxlamağa qadir olan dövlətdə bir yol nişanı 31 avroya (62 manat) başa gəlir. Rusiyada isə yol nişanı 850-950 rubl (25 manat) qiymətinə satılır.
Bunun adı rəsmi korrupsiya, büdcə pullarının yağmalanması, göz görə-görə çırpışdırılmasıdır.Və BNA yayılan xəbərlərə görə KİV-i savadsızlıqda ittiham edir. Amma yol nişanının birinin nə üçün 1840 manata alınmasına aydınlıq gətirmir.
Bir müddət əvvəl isə Bakı şəhərinin inzibati ərazisində piyada səkiləri və eynisəviyyəli piyada keçidlərində pandusların təşkili işləri üçün tender keçirilmişdi. Tenderin qalibi Elçin Mustafayevin faktiki sahibi olduğu “Econ” şirkəti olub. Həmin işlər görülüb.
Dövlət büdcəsindən 2 milyondan artıq vəsait bu məqsədə sərf olunub, amma iş icraçısı Ricat Arif oğlu Şeyxəliyevin pulu verilməyib.
Ümumiyyətlə, BNA rəhbəri Vüsal Kərimli prezidentin layihəsini batırıb, fiaskoya uğradıb.
Ölkə rəhbərliyi gözləyirdi ki, Bakıda bu qurum dayanma-durma, parklanma, sərnişindaşıma, taksi dayancaqlarının yaradılması problemlərinin heç olmasa yarısını həll edəcək. Amma nəinki öhdəsindən gələ bilməyiblər, şəhər tamamilə nəqliyyat xaosunun girdabındadır.
Üstəlik, dayanma-durma ilə bağlı BNA müfəttişlərinin əssasız cərimə yazmaları sürücülərin canını boğaza yığıb. Bunlar narazılığı azaltmaq əvəzinə gərginlik yaradırlar.
Görün nə vəziyyət idi ki, aparıcı Tolik Agentliyin qanunsuz cərimə siyasətinə etiraz olaraq qurum rəsmilərini sərt tənqid edib onlara cərimə olaraq ödənilən 20 manatı “tula payı” belə adlandırmaqdan çəkinməmişdi.
Görəsən, BNA vətəndaşa xidmət və vətəndaş məmnuniyyəti deyərkən həmən “pay məsələsinimi” nəzərdə tuturdu.
Hətta deputat Fazil Mustafa da Bakı Nəqliyyat Agentliyini tənqid etmişdi: “Dəfələrlə piyada zolaqlarının çəkilməsi məsələsini qaldırdım, reaksiya verən olmadı. Çünki burada xidmətdən söhbət gedir. Amma cərimə yığmaqdan söhbət gedəndə, dərhal reaksiya verirlər.
Bakı Nəqliyyat Agentliyi hələ də başa düşmür ki, dövlət büdcəsindən onlara vəsait ayrılır. Məhz dövlət büdcəsindən ayrılan vəsaitə görə də vətəndaşa xidmət eləməlidirlər.
Yol polisi dayanma-durma işi görürdü və ondan da keyfiyyətli həyata keçirirdi. Bakı Nəqliyyat Agentliyi ona görə yaradıldı ki, vətəndaşa daha yüksək, keyfiyyətli xidmət göstərsin. Keyfiyyətli xidmət budursa, burada keyfiyyət görünmür axı… ”
REPORTYOR.info
