Bakıda 122 nömrəli məktəbin biologiya müəllimi Nəsirov Xalid təhsil naziri Emin Əmrullayevə müraciət edib. Reportyor.info xəbər verir ki, müəllim müraciətində üzləşdiyi problemdən bəhs edib.
Onun sözlərinə görə, 2017-ci ildən 122 nömrəli məktəbdə biologiya müəllimi işləyir: “2018 ci ildə təhsil naziri cənab Ceyhun Bayramov tərəfindən Təşəkkürnamə ilə təltif olunmuşam.2021-ci ildə Bakı Şəhəri üzrə Təhsil İdarəsi direktor müavinlərinin işə qəbul imtahanını keçirib. Həmin imtahanda qarşılaşdığım haqsızlıqları Bakı Şəhəri üzrə Təhsil İdarəsinin rəhbərliyinə ünvanlayıb və Reportyor.info saytında işıqlandırmışam. Amma bu günə qədər müsbət cavab almamışam.
Hörmətli Emin müəllim, Bakı Şəhəri üzrə Təhsil İdarəsi Müəllimlərin işə qəbul imtahanında ( MİQ ) Bakı məktəblərinə işə qəbul ola bilməyən müəllimləri özünün təşkil etdiyi imtahanla Bakı məktəblərinə birbaşa direktor müavini təyin edir. Belə ki, əksəriyyəti xanım olan müəllimlər Bakıda yaşasa da, rayon məktəblərinə və yaxud ucqar kəndlərə işə qəbul olduqda məzuniyyət götürür. Bu məzuniyyət bitdikdən sonra Bakı Şəhəri üzrə Təhsil İdarəsinin “humanistliyi” ilə Bakı məktəblərinə birbaşa direktor müavini gətirilir”.
X Nəsirov qeyd edir ki, imtahanda iştirak etmək üçün iş stajı 3 il olmalıdır: “Bununla da imtahanda iştirak edənlərin sayı çox, vakanta çıxarılan yer sayının azlığı tərs mütənasibdir. Bakı Şəhəri üzrə Təhsil İdarəsi niyə ancaq Bakı məktəblərində çalışan müəllimlər üçün direktor müavini imtahanı təşkil etmir? Təbii haldır ki, ölkə üzrə 3 il stajı olan bütün müəllimlərin bu imtahanda iştirak etməsi müsahibənin ədalətsiz keçirilməsinə səbəb olur. Çünki vakant yer təkcə Bakı məktəblərindən verilir və çox az olur”.
Müəllim bildirib ki, Bakı Şəhəri üzrə Təhsil İdarəsinin direktor müavinlərinin işə qəbul imtahanın müsahibə komissiyasının mənə qarşı olunan haqsızlığı araşdırmağınızı və Bakı məktəblərinə tələb olunan direktor müavini imtahanların yalnız Bakı məktəblərində çalışan müəllimlərə aid olması ilə bağlı göstəriş verməyinizi xahiş edirəm.
