OPEC+ formatında əldə edilən və neft hasilatının sutkada rekord həcmdə-10 milyon barreldən çox azaldılmasını nəzərdə tutan sövdələşməyə baxmayaraq ötən iki gündə dünya bazarlarında neft yenidən kəskin ucuzlaşıb.
Reportyor.info xəbər verir ki, sövdələşmə xəbərlərinin təsiri altında kəskin bahalaşaraq 32 dollara qədər artan “Brent” nefti yenidən kəskin dəyər itirib və 27 dollara qədər geriləyib. Daha sonra qiymətdə nisbi artım baş verib və hazırda “Brent” markalı neftin bir barreli təqribən 29 dollara satılır.
Analitiklər neftin yenidən ucuzlaşmasının səbəbini koronavirus pandemiyası ilə bağlı tələbatın durmadan aşağı düşməsi, bazarda təklifdən on milyonlarla barrel artıq neftin olması ilə izah edirlər.
Hazırda bütün neft anbarlarları və tankerlər dolmaqdadır, hesablamalara görə yaxın günlərdə artıq nefti saxlamaq üçün boş yer qalmayacaq. Rusiyada şirkətlər indidən artıq nefti saxlamaq üçün dəmiryol sisternlərini kirayələməyə başlayıblar.
Bu arada ənənəvi olaraq “Brent” neftindən 1-2 dollar baha satılan yüksək küyfiyyətli “Azeri Light” Azərbaycan neftinin qiyməti daha kəskin ucuzlaşıb. AzərTAc xəbər verir ki, ötən gün aprelin 16-da “Azeri Light” markalı neftin bir barrelinin qiyməti 2,32 dollar ucuzlaşaraq 20,26 dollar təşkil edib.
Qeyd edək ki, Azərbaycan neftinin bir barrelinin qiyməti bu il aprelin 1-də minimuma enərək 16,53 dollar, 2008-ci ilin iyulunda isə maksimuma yüksələrək 149,66 dollar olub.
Azərbaycan neftinin bu cür aşağı qiymətə satılmasının səbəbi koronavirus pandemiyasına görə dünya üzrə aviareyslərin kəskin ixtisarı ilə bağlıdır. Çünki bu neftdən əsasən aviasiya yanacağının istehsalı üçün istifadə edirlər.
