Bakı Beynəlxalq Avtovağzalında qanunsuz şəkildə parklama təşkil olunub.

Reportyor.info məlumat verir ki, avtovağzalın qarşısındaşlaqbaum qoyulub və əraziyə girişi pullu edilib. Heç bir əsas, heç bir qanuni səbəb olmadan sürücülərdən pul yığılır. Avtovağzal ödənişli parkinq deyil, bura gələnlər isə ya yaxınlarını avtobusla yola salıb gedirlər, ya da taksilər müştəri gətirirlər.

Yəni heç bir halda maşınlar avtovağzalın ərazisində 3-4 dəqiqədən artıq qalmırlar, heç buna ehtiyac da yoxdur. Amma avtovağzal rəhbərliyi girişdə şlaqbaum qoyub, maşınlardan pul yığır. Üstəlik, 1-2 dəqiqəlik əraziyə daxil olan maşından da, 10 dəqiqə ərazidə dayanan sürücüdən də eyni məbləğ alınır – 1 manat.
Və qanunsuzluq həm də sürücülərə verilən qəbzdə öz əksini tapır. Əldəqayırma, heç bir hüquqi əsası olmayan qəbz verməklə etdikləri soyğunçuluğa don geyindirirlər. Təsəvvür edin ki, hər gün yüzlərlə maşın avtovağzala daxil olur, cəmi 3 dəqiqə sonra ərazini tərk edir, hamı da 1 manatdan ödəniş edirlər.

Ortada böyük pullar dövr edir və vergidən yayınırlar. Bəs, bu vəsaitlər kimlərin cibinə gedir? Dövlət nə üçün avtovağzalda yaşanan özbaşınalığa son qoymur? Bu pullar hara axır və vergilər idarəsi niyə yoxlama aparmır? Qeyd edək ki, avtovağzal Prezidentin İşlər İdarəsinin tabeliyindədir. İdarənin rəhbəri Ramin Quluzadədədir.