Ailə, Qadın və Uşaq Problemləri üzrə Dövlət Komitəsinin təşkil etdiyi qurum ciddi səhvə yol verib.
Reportyor.imfo xəbər verir ki, bu barədə əməkdar jurnalist Fadil Paşayev sosial şəbəkə hesabında paylaşım edib. Onun yazdıqlarını oxucularln diqqətinə çatdırırıq:
“Azərbaycan milli mətbuatının 150 illiyi münasibətilə keçirilən tədbirdə Ailə, Qadın və Uşaq Problemləri üzrə Dövlət Komitəsinin rəhbəri Bahar Muradova bir daha “dəqiqliyə və diqqətə” olan özünəməxsus yanaşmasını nümayiş etdirdi. Tədbirin adı gurultuludur: “Ailə, qadın və uşaq məsələləri media müstəvisində: çağırışlar və perspektivlər.” Amma görünür, “çağırış” elə tədbirin özündə başlayıb.
Tədbirin proqramında qonaqların siyahısında belə bir təqdimat yer alıb: “Hikmət Babaoğlu – “Yeni Azərbaycan” qəzetinin baş redaktoru”.
Bir anlıq düşünürsən ki, bəlkə tarix geri qayıdıb, qəzetin baş redaktoru yenidən Babaoğludur? Amma yox, bu, nə “retro yubiley”dir, nə də “nostalji səhv”. Bu, sadəcə, Bahar xanımın rəhbərlik etdiyi tədbirin səviyyəsini göstərən bir detaldır.
Axı Bahar Muradova uzun illərdir dövlət idarəçiliyindədir. Diplomatik zəriflik, idarəetmə təcrübəsi, siyasi mədəniyyət – bütün bunlar onun bioqrafiyasında var. Amma görünür, “dəqiqlik” bəndi orada unudulub.. Çünki “Yeni Azərbaycan” qəzetinin hazırkı baş redaktoru kimdir — bunu bilmək üçün elə bir “strateji araşdırma qrupu” da lazım deyil. Onun özü çox yaxşı bilir cavabını.
Bəlkə də məqsəd sadəcə “texniki səhv” deyə adlandırılacaq bir laqeydlik deyil. Ola bilər ki, bu, “təyinatla mesaj” üsuludur. Yəni Bahar xanım öz “səhv”i ilə kimlərisə yada salır, kimlərəsə “yerini” göstərir. Axı bizim idarəçilik mədəniyyətində bəzən bir səhv cümlə yüz cildlik nitqdən daha çox şey deyir.
Əgər bu sadəcə diqqətsizlikdirsə, deməli, tədbirin ruhuna yaraşmayan ciddiyyətsizlik baş verib.
Əgər bu qəsdən edilmiş bir jestdirsə, deməli, Bahar xanım “mətbuat tarixi”nə bir növ “meta-ironiya” qatmaq istəyib: 150 illik yubiley tədbirində hələ də köhnə adların təkrarı.
Bir daha sübut olunur ki, bizdə bəzi “təyinatlar” və ya təqdimatlar sadəcə adlardan ibarət deyil. Onlar həm də düşüncə tərzinin göstəricisidir.
Odur ki, Bahar xanımın bu təqdimat səhvi bəlkə də təsadüfi deyil. Bəlkə də bu, onun “öz təyinatıdır” – yəni kiminsə köhnə titulu ilə bu günün media mənzərəsini göstərmək istəyidir”.
