“… Bəzi hallarda gələnləri incidirlər, yolda saxlayırlar, onlardan əsassız rüşvət, pul tələb edirlər, dilənçilik edirlər, keçidlərdə duran o adamlar xalqımızı, dövlətimizi biabır edirlər…” Ölkə başçısı bu fikirləri bir neçə gün öncə bəzi hüquq-mühafizə orqanları və sərhəd xidməti əməkdaşlarını nəzərdə tutaraq söyləmişdi. Ancaq təəssüf ki, “dilənçilik edənlərin” siyahısı təkcə həmin şəxslərlə məhdudlaşmır və bu sırada ölkəmizin səhiyyə sistemində təmsil olunanlar da xüsusi yerə malikdir.
Ölkədə səhiyyənin ümumi vəziyyəti sağlamlıq durumundan asılı olmayaraq, hər birimizə məlumdur. Lakin hansısa ciddi xəstəliyə düçar olmadan, səhiyyənin insanlarımıza verdiyi əzabları tam təsəvvür etmək çətindir.
Azərbaycanın səhiyyə sisteminin nə vəziyyətdə olduğunu deməyə gərək yoxdur. Reportyor.info xəbər verir ki, Bakı da daxil olmaqla, əyalətlərdə xəstəxanalarda göstərilən xidmətin bərbad olması, rəsmi sənədlərdə pulsuz olan xidmətlərin hamısı pulludur. Vətəndaşların narazılığı isə ən pik həddədir.
Səhiyyə Nazirliyi isə üzdə bir söz deməklə bərabər, arxada bildiyi kimi hərəkət etməklə əslində, cəmiyyətdə özünə qarşı etiraz formalaşdırır. Reportyor.info xəbər verir ki, Oqtay Şirəliyevin fəaliyyətinin qeyri-qənaətbəxş olmasını elə hakimiyyət dairələri də yaxşı bilirlər. Onun işinin öhdəsindən gələ bilmədiyi, səhiyyə sisteminə nəzarəti əldən verməsi, nazirlik daxilində ciddi problemlər yaratdığı artıq hər kəsə bəlli məsələdir.
Azərbaycan səhiyyəsini reanimasiyaya və komaya salan Əli İnsanov artıq 12 ildir ki, həbsdədir. Bu nəyi dəyişib?! Heç nəyi.
Fiqurların dəyişikliyi əsla sistem dəyişikliyinə səbəb olmur. Pisi lap pis əvəzləyir.
Ona görə də Əli İnsanovu əvəzləyən Oqtay Şirəliyev Azərbaycan tibbini nə komadan çıxarıb, nə reanimasiya şəraitindən! Reportyor.info yazır ki, qocaman nazirin dövründə ölkənin səhiyyəsi qanqrena verməkdədir, tək yol var – kəsib atmaq.
Azərbaycan xalqının nifrət etdiyi, lənətlədiyi, qəzəb və od püskürdüyü Səhiyyə Nazirliyi qədər heç bir dövlət orqanına belə üsyan yoxdur: ana və uşaq ölümləri, səhv diaqnozlar, sağlam adama vərəm, xərçəng xəstəliyi qoyulması, həkim səhlənkarlığı, orqan mafiyası, soyğunçuluq, rüşvətxorluq, dərman biznesi, bərbad şəraitli xəstəxanalarda bisavad həkimlərin özbaşınalıqları, klinikalarda pasientlərin başınaq oyun açılması, onkoloji xəstələrin yaxınlarının soğan qabığı kimi soyulması, əməliyyat masasında ani səhvdən insan ölümü, doğum şöbələrində açıq bazarlıq, regionlardakı xəstəxanalarda rəzalət və s. hallar əhalini partlayış nöqtəsinə gətirib çıxarıb.
Əli İnsanovun həbsindən sonra Oqtay Şirəliyevin ölkə səhiyyəsini gətirib çıxardığı nöqtədir. Azərbaycanda tibb sahəsi məhv edilməklə yanaşı genofond dağıdılır.
İnsanlar həkimlərə etibar eləmir, İran, Türkiyə, Gürcüstan, daha böyük imkanı olanlar Avropaya müalicə, əməliyyat üçün üz tuturlar.
Elə Azərbaycan hakimiyyətində təmsil olunanlar da, Oqtay Şirəliyev də, müavini Elsevər Ağayev də, başqaları da ölkə səhiyyəsinə güvənmirlər.
Nə tibbi sığorta var, nə can təminatı, nə qiymətlərə nəzarət, nə dövlət xəstəxanalarında pulsuz xidmət, nə özəl klinikalarda tariflərin tənzimlənməsi…
Şəkərli diabetlər, onkoloji xəstələr, vərəmli, cüzamlı insanlar, minlərlə vətəndaşın büdcədən ayrılan pulları, dərmanları mənimsənilir, satılır, biznesə çevrilir.
Öz vətəndaşlarına yüksək səviyyədə tibbi xidmət göstərən, xalqının qayğısına qalan, həkimləri rüşvət almayan, klinikaları insanları soymayan, özünə hörmət qoyan bir dövlət niyə vətəndaşlarının rüşvət bataqlığında boğulan bir ölkənin səhiyyəsinin caynağına atmalıdır?!
Oqtay Şirəliyevv nazir olduğu dövrdə köklü islahatlar aparmalıydı.
Amma bunların heç biri nəinki olmadı, ölkənin səhiyyə sistemində rüşvət və səhlənkarlıq xərçəng kimi yayılmağa başladı.
10 il əvvəllə müqayisə edəndə, indi Azərbaycan xalqının öz həkiminə, tibbinə zərrə qədər də etibarı, inamı qalmayıb.
Ümumiyyətlə, prezident İlham Əliyevin komandasında Oqtay Şirəliyevin gənc nazirlə əvəzlənməsi zərurəti var. Bunu tez-tez ekspertlər də, keçirilən sorğularda vətəndaşlar da dilə gətirirlər.
İndiki durumda səhiyyə kimi önəmli sektora islahatçı, gənc və işləyən bir nazir təyin olunarsa, müəyyən pozitiv nəticələr olacağına ümid etmək olar.
Bir toplumun məhvi üçün onun təhsil və səhiyyəsi məhv olunmalıdır ifadəsi nə qədər şablon səslənsə də, günümüzün tərs şapalaq kimi reallığdır ki, hər dəfə üzümüzə çırpılır.
Ölkənin adını batıran, dünyada rüsvay edən, Səhiyyə Naziri yalnız və yalnız istefa verməlidir.
P.S Allah bütün xəstələrimizə şəfa, bu sahəyə nəzarət və yiyəlik edənlərə isə azacıq insaf versin..
REPORTYOR.info
Discussion about this post