Azərbaycanda problemli kreditlərin həcmi durmadan artır. 2025-ci ilin iyun ayının sonunda ölkədə vaxtı keçmiş kreditlərin həcmi 527,4 milyon manat civarında olub.
Azərbayan Mərkəzi Bankının açıqlamasına görə, həmin rəqəm 2024-cü ilin ilin eyni dövrü ilə müqayisədə 75,7 milyon manat (16,8 faiz), cari ilin may ayının sonu ilə müqayisədə isə 19,1 milyon manat (3,8 faiz) çoxdur. Belə ki, ötən ilin sonunda Azərbaycanda vaxtı keçmiş kreditlərin məbləği 451,7 milyon manat, 2025-ci ilin mayın sonunda isə 508,3 milyon manat həcmində olub.
Modern.az-a açıqlamasında iqtisadçı-ekspert Eldəniz Əmirov bildirib ki, kredit portfelinin həcminin durmadan artması, ümumilikdə müsbət hal kimi qiymətləndirilə bilər, lakin istehlak kreditlərinin sayının artması müəyyən mənfi təsirlər yaradır.
“Kreditlər müxtəlif kateqoriyalara bölünür və onlardan biri də istehlak kreditləridir. Bu kontekstdə mən düşünürəm ki, məsuliyyət yalnız bankların deyil, daha çox vətəndaşların üzərinə düşür. Çünki heç bir bank vətəndaşı məcbur etmir ki, yüksək faizlə kredit götürsün. Məsələn, bank heç vaxt vətəndaşa demir ki, “gəl kredit götür, özünə “Ayfon”, paltaryuyan, robot tozsoran və ya qızın üçün ən bahalı mebeli al”. Buna vətəndaş özü qərar verir və övladına ən yaxşısını təmin etmək istəyir. Təbii ki, bu da vətəndaşın haqqıdır”.
Ekspert onu da əlavə edib ki, nəticədə həmin kreditləri qaytara bilməyəndə onların kimisə günahlandırması düzgün deyil:
“Kredit üçün müraciət edən şəxs bu məsuliyyəti əvvəlcədən dərk etməlidir”.
E.Əmirov həmçinin vurğulayıb ki, bu məsələdə bankların da üzərinə bir sıra vəzifələr düşür:
“Artıq bu istiqamətdə Mərkəzi Bank tərəfindən müəyyən addımlar atılır. Zənnimcə, istehlak kreditlərinin verilməsi ilə bağlı şərtlərin bir qədər sərtləşdirilməsinə ehtiyac var. Çünki bəzən ödəmə qabiliyyəti olmayan şəxslərə də kredit verilir. Bu isə olduqca təhlükəli tendensiyadır.
Ona görə də həm banklar, həm də vətəndaşlar bu məsələyə daha ciddi və məsuliyyətli yanaşmalıdırlar”,- deyə o bildirib.
