Azərbaycanda havadan Oruellin “1984” romanının qoxusu gəlir – total qorxu və kütləvi psixoz…Bu, aylardır davam edir. Toplum dünyanın informasiya terrorunun qarşısında aciz vəziyyətdədir.
Sanki qaranlıq hücrədəsən və dörd divarın hər birinə toxunuşda qulaqbatıran qorxunc səslər eşidirsən. İnsanlar tamamilə ümidsiz və pessimist olublar. Onları COVİD19-la uzun müddət yaşamağa öyrəşməyə çağırırlar. Bu, mikroba adaptasiyadan əvvəl beyinlərdə immunitet yaradılması siyasətidir.
Bəşəriyyəti barmağına dolayan ÜST kimi mafioz, korporasiya maraqlarına xidmət edən təşkilatın fəaliyyəti bəzi siyasi hakimiyyətləri də qane etməkdədir.
Nədən ki məşhur nəzəriyyəçi Naomi Klaynın “idarə olunan xaos” metodologiyası işə yaramaqdadır. Xalqları həbsxanada və nəzarətdə iki yolla saxlamaq olur: müharibə şəraitində və epidemiya yayılanda…
***
Lakin Azərbaycanda qanunverici orqanın üzvlərinin ürəyindəndir ki, ölkədə gestapo şəraiti yaradılsın. Anaxeber.info yazır ki, parlament üzvləri deyəsən, karantinlə gestaponu səhv salıblar.
İnfeksiyaya yoluxmaların artması hələ o demək deyil ki, Azərbaycanı zindana çevirsinlər. Gözümüzün qabağında bir neçə ay əvvəl İsveç kimi dövlət heç bir karantin təbiq etmədən virusla yaşamağa davam etdi.
Azərbaycanlı anti-millət vəkilləri isə xora qoşulublar, Siyavuş Novruzov COVİD19-a inanmayanları cəzalandırmağa çağırır, Fəzail Ağamalı təklif edir ki, heç kimə güzəşt olmasın, SMS də ləğv olunsun, Elman Nəsirovun fikrincə, cərimələr artırılsın, 1000 dollardan çox olsa nəticə verə bilər.
Xalqa 1 manat verilməsini hökumətə təklif etməyən və hamılıqla bir ağızdan sərt qaydaların, cəzaların tərəfdarı olan bu deputatlar sərt karantin rejimini sərt diktatura rejimi ilə əvəzləmək niyyətində görünürlər. Onların sözlərindən belə çıxır ki, maska taxmayanı az qala şəriət hökmləri ilə şallaqlasınlar, falaqqaya bağlasınlar.
“İslahatçı parlamentin” deputatları sayılan bu mandat sahibləri seçicinin xeyrinə olan heç bir təşəbbüslə çıxış etmirlər. Əksinə, iqtidarın yerinə “karantin zopası” ideyaları irəli sürürlər. Halbuki, millət vəkilləri hökuməti ayıq-sayıq etməlidir. Bəyan olunmalıdır ki, Azərbaycan əvvəl gündən İsveç variantına getməliydi.
Karantini uzatmaqla, məhrumiyyətlər tətbiq etməklə, problemi həll etmək mümkün olmayacaq. Ölkə çökür, iqtisadiyyat dibə vurub, insanlar yoxsul vəziyyətə düşürlər. Bu karantinlərin davam etməsi ölkədə sosial zəminli etirazların kütləviləşməsinə çevriləcək.
Deputatlar isə kustar cəza mexanizmləri təklif edirlər. Onlar Yasamalda cəza maşınının hansı nəticə verdiyini xatırlamırlar. Hazırda gərgin vəziyyətdə olan cəmiyyətdə ab-havanı yumşaltmaq zamanıdır.
***
İlk növbədə rayonlara gediş-gəliş şəraiti yaradılmalıdır, Bakı boşaldılmalıdır, kiçik dükanlar açılmalıdır, marketlərin girişlərində nəzarətçilər saxlanmalıdır ki, maskasız daxil olanlara xəbərdarlıq etsinlər, orta və kiçik sahibkarlıq şəffaf şəkildə dəstək göstərilməlidir, 190 manat yardım əhalini geniş planda əhatə etməlidir, yəni ən azı 2-3 milyon vətəndaşa birdəfəlik ödənişlər olmalıdır.
Amma parlamentin əvvəlkindən təfavütü olmayan indiki deputatlarının heç biri xalqın maraqlarına uyğun bu cür təkliflər irəli sürmürlər, kimisi fövqəladə rejim, kimisi ağır cəza tərəfdarıdır.
Bu müddət ərzində bir deputatın dilindən eşitmədik ki, əmək haqlarının artırılmasına çağırış etsin, biri özündə cəsarət tapıb söyləmədi ki, işıq pulu borcu bir ay hesablanmasın yaxud limit artırılsın.
Axı yaydır, insanlar isti havada evlərdə kondisioner işlətməli olur və bu da əlavə enerji xərcidir. Heç bir deputatın ağzından çıxmadı ki, maska pulsuz paylansın və ya qiyməti ucuzlaşdırılsın.
Amma xalqı günahkar, məsuliyyətsiz çıxarmaqda növbəyə düzülüblər. Çünki onlar fevralda keçirilən seçkilərdə laqeyd dedikləri xalqdan səs almayıblar, təyin olunublar. Və ayda 3000 manatdan yuxarı maaş alan, “ağzı isti yerdə olan” deputatların işsiz, borc içində batan əhaliyə “Evdə qal” çağırışı etməsinə nə var ki?!
Ümumiyyətlə, əgər avqustun 1-nə qədər ölkədə karantin rejiminin saxlanıldığı açıqlanırsa, avtomatik olaraq aztəminatlı vətəndaşlara, biznesə, sahibkarlıq subyektlərinə əvvəlki həcmdə də olsa, dəstək verilməliydi.
Rəsmi məlumata görə, iki aylıq bu dəstəyin ümumilikdə maliyyə tutumu 550 milyon manat civarında olub.
Əgər pandemiyaya qarşı mübarizəyə 3.5 milyard manat ayrıldığı bəyan olunubsa, bu məbləği qarşılamaq məntiqlə hökumət üçün problem olmamalı idi. Görünür, reallıqlar heç də deyildiyi kimi deyil.
Deputatlar isə həqiqətləri həmişə olduğu kimi deyə bilmirlər, onlar pandemiya şəraitində belə anti-xalq ritorikadan əl çəkmirlər…
