Məhərrəmlik ayı və Aşura bu il koronavirusla bağlı yaranmış təhlükəli və riskli şəraitə təsadüf edib. Xarici ölkələrin təcrübəsi göstərir ki, dini ibadət yerlərinin kütləvi tədbirlər üçün açılması həmin ölkələrdə epidemioloji vəziyyətə olduqca mənfi təsir göstərib.
Buna əsasən, deyə bilərik ki, Aşura ilə əlaqədar kütləvi dini tədbirlərin, ayinlərin keçirilməsi ölkədə vəziyyətin yenidən pisləşməsinə, karantin rejimininin daha da uzanmasına və ya yenidən sərtləşdirilməsinə səbəb ola bilər. Deməli, bu məsələdə xüsusi riskə getməmək başlıca şərtdir.
İçərişəhər “Cümə” məscidinin axundu, ilahiyyatçı Hacı Surxay Məmmədli Yenisabah.az-a açıqlamasnda insanların mövcud şəraitlə əlaqədar Aşurada nə etməli olduqlarından danışıb:
“Bildiyimiz kimi, pandemiya ilə əlaqədar dünyanın hər yerində böyük problemlər meydana gəlib. Toy, yas mərasimləri və digər bu kimi məsələlər pandemiya ilə bağlı olaraq məhdudlaşdırılıb. Eyni zamanda məscidlər də bağlanılıb. Yəni bu artıq bizdən asılı olan bir şey deyil, İlahi bir mesajdır, imtahandır. Operativ Qərargahın verdiyi qərarı əsas tutaraq biz qaydalara əməl edirik. Çünki biz bu cəmiyyətdə yaşayırıq. Aşura bir şəhidlik, fəda, vəfa məktəbidir. O, bizə səmimi dəyərləri, qonşuluq, dostluq münasibətlərini öyrədir. İnsanın necə olmalı olduğunu, kamillik nümunəsini İmam Hüseyn Kərbalada göstərdi. Biz bunu əsas tutaraq Aşura günündə insanların yanında olmalı, ehtiyacı olanlara bacardığımız qədər yardım etməliyik. Məhz Aşura dərslərinin formatından çıxış edərək onu qeyd edim ki, insanlar çoxlu namaz qılmalı, dua etməli və sədəqə verməlidir. Bunlar Aşura gününün təzahürüdür. Öz ehtiramımızı bu formatda göstərə bilərik. Hər birimiz evimizdə həm İmam Hüseynə yas saxlamalı, həm də o yardımlaşmanı etməliyik”.
