“Bu gün artıq “Siyasi partiyalar haqqında” qanunun yenidən işlənməsi zərurəti yaranıb. Çünki “Siyası partiyalar haqqında” qanun 1992-ci ildə iyun ayında qəbul edilib.
Bu gün ölkədə qanunvericilik sahəsində yeni bir siyasi sistem yaranıb. Buna görə də Milli Məclis tərəfindən lazımi addımların atılması zəruridir”.
Bu fikirləri millət vəkili Arzu Nağıyev Reportyor.info-ya deyib. Onun sözlərinə görə, bu baxımdan Milli Məclisdə təmsil olunan bütün partiyaların nümayəndələri yeni qanunun layihəsinin hazırlanması üçün spikerə müraciət ediblər:
“Artıq Milli Məclis prosesə başlamaqla bağlı açıqlama verib və məclisin plenar iclasına, komitələrin iclasına çıxarmazdan əvvəl Milli Məclisin öz saytında yerləşdirilib. Sentyabrın 28-də həmin qanun layihəsinin ilk ictimai dinləməsinin keçirilməsi nəzərdə tutulub. İyul ayının 26-da layihə ilə bağlı təkliflərin təqdim edilməsi üçün Azərbaycanda qeydiyyatdan keçən bütün siyasi partiyalara müraciət olunub”.
A.Nağıyev bildirib ki, 39 siyasi partiya öz təklifini rəsmi olaraq Milli Məclisə təqdim edib: “Layihə hazırlanarkən bütün beynəlxalq konvensiyalar, 20-dən artıq ölkənin təcrübəsi nəzərə alınaraq məhz layihə hazırlanıb. Məclisin saytında layihənin ilkin variantı da işlənib, müzakirəyə verilib.
Düşünürəm ki, bu zəruri bir məsələdir. Siyasi partiyalar haqqında yeni qanun layihəsinə Milli Məclisdə mütləq baxılacaq və bu layihənin qəbul edilməsi ona görə mühümdür ki, Azərbaycanın siyasi həyatında siyasi partiyaların öz yerini tutması qanunla tənzimlənəcək”.