Deputat Aqil Abbas Milli Məclisin növbədənkənar iclasında çıxış edərək seçicilərinin müraciətini səsləndirib.
O deyib ki, ölkə rəhbərliyi pandemiya dövründə vətəndaşlara yardım edir, yeni iş yerləri açılır. Ancaq onun seçildiyi Ağcabədidə insanları işdən çıxarırlar: “Ağcabədidə 105 nəfər kitabxanalarda çalışan insan var. Vaxtilə kənd kitabxanalarını ləğv etdilər. İndi də deyirlər ki, 35 nəfər ixtisar olunmalıdır. Yəqin digər rayonlarda da eyni vəziyyətdir. Niyə, qardaş?
Doğrudanmı bu boyda büdcəsi olan dövlətimiz 35 nəfərin aldığı 200 manata möhtacdır? Mədəniyyət nazirimiz yoxdur, yəqin ki, yenisi təyin olunacaq. Maliyyə Nazirliyindən xahiş edirəm, o insanlarla işiniz olmasın.
Ay qardaş, o qədər ixtisar olunmalı yer var. Bir dənə rayon adını çəksinlər ki, orda kitab mağazası var. Gəncəni, Naxçıvanı demirəm. Möhtərəm prezidentimiz deyir heç kəsi işdən çıxartmaq olmaz, bunlar da kitabxanada çalışanları işdən çıxarırlar. Kitaba niyə bu qədər nifrət edirlər, başa düşə bilmirəm”.
