Azərbaycan Milli İstiqlal Partiyası (AMİP) qurultaya hazırlaşır. Partiyanın 11-ci qurultayı avqustun 15-də onlayn formatda keçiriləcək.
Pandemiya səbəbindən kütləvi toplantıların qadağan edilməsinə görə partiya qurultayı onlayn video formatda keçirməli olacaq.
Bu mövzuda sədrliyə yeganə namizəd, hazırda AMİP-in sədr əvəzi Arzuxan Əlizadə ilə söhbətləşdik.
Onun “Yeni Müsavat”a bildirdiyinə görə, qurultaya hazırlıq son mərhələdədir və texniki məsələlər həll olunur.
A.Əlizadə qeyd etdi ki, qurultayın ənənəvi şəkildə keçirilməsi arzu olunurdu, lakin pandemiya səbəbindən tədbir onlayn şəkildə təşkil ediləcək.
AMİP sədrliyinə namizədin sözlərinə görə, qurultayı adi qaydada keçirmək daha asandır:
“Kəndlərdə, rayonlarda olan qurultay nümayəndələri ilə əlaqə qurmaq, onları prosesə qoşmaq üçün texniki məsələləri həll etmək lazımdır.
Bütün sənədlərin, nizamnamənin dəyişilməsi gözlənilir, Mərkəzi İntizam Komissiyasına seçkilər nəzərdə tutulur. Bütün prosedurlar yerinə yetirilib.
Əgər pandemiya olmasaydı, ənənəvi qurultay keçiriləcəkdi. Lakin bizim son toplantımız oktyabrda olub. O zaman bələdiyyə seçkilərinə hazırlıq müzakirə olunmuşdu.
Lakin növbədənkənar parlament seçkiləri elan olundu və biz qurultayı marta qədər ertələdik. Martdan pandemiya başladı və qurultayı keçirə bilmədik. Amma avqustun 15-də qurultay keçiriləcək”.
A.Əlizadə bildirdi ki, sədr postuna ondan başqa namizədliyini hələ ki irəli sürən olmayıb: “İndiyə qədər müraciət edən olmayıb. Bəlkə də ilk dəfə alternativsiz bir qurultay olacaq. Sözsüz ki, sədrlik arzusunda olanlar var. Amma bu haqda ətraflı cavab verməyim etik olmaz. Buna qurultay günü geniş izah veriləcək. Bununla belə hesab edirəm ki, AMİP-də sədrliyə layiqli insanlar var”.
Sədr əvəzi onu da əlavə etdi ki, onlayn qurultayda AMİP-in fəxri lideri Etibar Məmmədov da iştirak edəcək. Onun sözlərinə görə, qurultaydan sonra partiyanın işinin çevik formata keçirilməsi nəzərdə tutulur.
“Bu gün reallıqlardan irəli gələrək toplantılar keçirmək olmur, partiya üzvləri ilə onlayn formada ünsiyyət qururuq.
Amma nizamnaməyə dəyişiklik nəzərdə tutulur, katiblik vəzifəsinin ləğvi, yerinə sədr və müavinləri postunun yaradılması plandadır.
Eyni zamanda Mərkəzi Şuranın işini canlandırmaq istəyirik. Təbii ki, bu yeniliklərin təşkilində təzə kadrlar da olacaq.
Həmçinin, Mərkəzi İntizam Komissiyası yenilənəcək, müşavirlər və müavinlər təyin olunacaq. Ümumiyyətlə, AMİP daha fəal fazaya keçməlidir”, – deyə sədrliyə namizəd vurğuladı.
A.Əlizadə bildirdi ki, qurultaydan sonra AMİP digər partiyalarla əməkdaşlığa isti yanaşacaq:
“Bundan əvvəl bir sra partiyalarla müzakirələrimiz olub, düşünürəm ki, onlarla əməkdaşlıq müqavilələri imzalamaq həddinə gəlib çıxmalıyıq.
Ümumiyyətlə, AMİP-in ölkənin siyasi mühitində aktiv iştirakını təmin etməliyik, ictimai-siyasi həyatında təsir rıçaqlarını özünə qaytarmalıyıq”.
