Ağstafa Rayon İcra Hakimiyyətində rayonun rəhbər işçilərinin və inzibati ərazi dairələri üzrə nümayəndələrinin iştirakı ilə onlayn müşavirə keçirilib.
Reportyor.info xəbər verir ki, müşavirədə Ağstafa rayonunda koronavirus (COVID-19) pandemiyası ilə mübarizə istiqamətində görülən işlər, həyata keçirilən tədbirlər müzakirə olunub.
Müşavirədə çıxış edən Ağstafa Rayon İcra Hakimiyyətinin başçısı vəzifəsini əvəz edən Lalə Eyyubova bildirib ki, rayon ərazisində mütəmadi olaraq koronavirus infeksiyasına qarşı təmizlik və tibbi dezinfeksiya işləri aparılır, xüsusi karantin rejimi dövründə maddi yardıma ehtiyacı olan ailələrin, o cümlədən 65 yaşdan yuxarı vətəndaşların qayğıları daim diqqət mərkəzində saxlanılır.
Nazirlər Kabineti yanında Operativ Qərargahın təlimat və tövsiyələrinin yaşayış məntəqələrində əhaliyə çatdırılması istiqamətində lazımi tədbirlərin görülməsi, xüsusi karantin rejiminin tələblərinə ciddi şəkildə riayət olunması, sakinlər arasında fərdi qaydada maarifləndirmə işlərinin aparılması ilə bağlı göstərişlərini verən L.Eyyubova rayonun yaşayış məntəqələrində tibbi dezinfeksiya işlərinə nəzarətin gücləndirilməsinin, mobil qrupların köməyi ilə sakinləri maraqlandıran bütün məsələlərə həssaslıqla yanaşılmasının vacibliyini diqqətə çatdırıb. Daha sonra gündəlikdə duran digər məsələyə toxunaraq ipəkqurdu toxumunun gətirilməsinin planlaşdırıldığını, bununla əlaqədar kümçülər tərəfindən ipəkqurdu toxumunun qəbuluna hazırlıq işlərinin yekunlaşdırılmalı olduğunu qeyd edib. Barama kümxanaların hazırlanması barədə məlumatları dinlədi, bu sahədə həlli vacib məsələlərin icrası ilə bağlı inzibati ərazi dairəsi üzrə nümayəndələrə və digər aidiyyəti məsul şəxslərə tapşırıqlarını verdi.
Onlayn müşavirədə, həmçinin ərazi icra nümayəndələrinə hər bir ailənin, xüsusilə 65 yaşdan yuxarı olan insanların yaşadığı ailələrin nəzarətə götürülməsi, əhalinin sıx toplaşdığı ərazilərdə təmas imkanlarının minimuma endirilməsi, vətəndaşların yalnız ciddi ehtiyac duyulduğu təqdirdə evlərindən çıxmaları ilə bağlı müvafiq tapşırıqlar verilib.
