Abşeron gənclər şəhərciyinin sakinləri bu gün səhər Bakı Mühəndislik Universitetindən Yaşıl bazar istiqamətində hərəkət edən 199 saylı avtobusu 27 dəqiqə gözləməli olublar.
Avropa.info-nun məlumatına görə, Riyad ticarət mərkəzinin qarşısından səhər saat 08:31-dən hərəkət edən avtobusdan sonra növbəti avtobus saat 08:48-də dayacanağa gəlib.
Sərnişinlərin avtobusun gecikməsi ilə bağlı etirazına sürücü “mənlik deyil” cavabını verib.
Qeyd edək ki, sentyabrın ayının 15-dən sonra 199 saylı marşrut avtobusunda səhərlər daha çox gecikmələr müşahidə olunur. Sərnişinlər işə gecikməsin deyə, həmin yolda hərəkət edən 1 manatlıq taksi xidmətlərindən istifadə edilər.
Yaranan problemlə bağlı danışan “Xaliq Faiqoğlu” MMC-nin mətbuat katibi Nizam Rzayev bildirib ki, 199 saylı marşrut xəttində elektron ödəmə sisteminin (BakıKart) tətbiq edilməsinə başlanılıb və son günlərdə xətt üzrə avtobusların sayı artırılaraq interval 5 dəqiqəyə endirilib: “Lakin günün müəyyən saatlarında Şamaxinka, 20 yanvar mts, 3-cü mkr dairəsi, Xutor dairəsi, Atatürk prospekti, “Gənclik” mts, Xətai prospekti istiqamətində baş verən tıxac və sıxlıq avtobusların intervalının pozulmasına səbəb olur və gecikmələr yaşanır. Bütün sərnişinlərdən xahiş edirik bu kimi məsələlərdə anlayış göstərsinlər”.
Lakin iş orasındadı ki, bu gün səhər avtobusun gecikdiyi zaman intervalında Bakı Mühəndilik Universitetinin qarşısındakı dayanacaqda 199 saylı marşrutun 3 avtobusu hərəkət etmədən gözləyib. Sürücünün dediyinə görə, həmin avtobuslardan biri nasaz olub.
Sərnişinlərin işə gecikməməsi üçün avtobusların bir qismini üzü şəhərə doğru hərəkət istiqamətində artırmaq mümkündürmü, sualına N.Rzayev bildirib ki, avtobusların hamısını sonuncu dayanacaqda saxlamaq sadəcə mümkün deyil, hamısı qrafik üzrə çıxır və şəhərin mərkəzində intervallar bizdən asılı olmayan səbəblərdən pozulur: “Bir daha nəzərinizə çatdırmaq istəyirəm ki, bu halların yaranmamasına çalışırıq”.
Görünən odur ki, bütün bu vədlər və açıqlamalar sərnişinlərin rahatlığı üçün müsbətə doğru heç nəyi dəyişmir. Çünki ən çox şikayət olunan marşrut avtobuslardan biri də məhz 199 saylı avtobuslardır.
35 minə yaxın əhali yaşayan Abşeron gənclər şəhərciyinin sakinləri yalnız 199 saylı marşrut avtobuslardan istifadə edə bilir. Yol boyu yaşayan əhalinin sıxlığını da nəzərə alsaq, bu ərazi üzrə yalnız bir marşrutun fəaliyyət göstərməsi sərnişinlərin avtobus problemini həll edə bilməyəcək.
