ABŞ-İran arasında uzun müddət davam edən soyuq savaş 2020-ci ilin əvvəlində alovlandı və tərəflər raket qarşıdurmasına başladılar. Bu gərginlik fonunda bəzi simvolik nüanslar, tərəflərin bir-birilərinə ötürdükləri məxfi mesajlar diqqət çəkdi.
Axar.az xəbər verir ki, “Hürriyyət” bu simvolik mesajları qruplaşdırıb.
ABŞ-ın 52 hədəf cavabı
ABŞ Prezidenti Donald Tramp Tehranın SEPAH komandanı Qasım Süleymaninin öldürülməsinə reaksiya verəcəyi təqdirdə İrana məxsus 52 hədəfi vuracaqlarını dedi. Bu rəqəmin 1979-cu ildə Tehranda girov götürülmüş 52 amerikalıya işarə olduğu deyilir.
İrandan 290 hədəsi
İran Prezidenti Həsən Ruhani öz Tvitter səhifəsində “52 rəqəminə eyham vuranlar 290 rəqəmini xatırlamalıdırlar” yazdı. Ruhani bununla 1988-ci il iyulun 3-də ABŞ-ın Dubaya gedən bir İran təyyarəsini raketlə vurması nəticəsində 290 nəfərin həlak olmasına diqqət çəkdi.
52 ədəd F-35 nümayişi
ABŞ bir qədər əvvəl Yutada planlaşdırılmış aviasiya təlimində 52 ədəd F-35A tipli döyüş təyyarəsini nümayiş etdirdi. 52 rəqəmi növbəti dəfə gündəmə gəldi.
Süleymani vaxtı ilə…
Qasım Süleymani İraqın paytaxtı Bağdadda saat 01:20-də öldürüldü. İran da öz növbəsində ABŞ hədəflərinə cavab zərbəsini saat 01:20-də həyata keçirdi.
Trampın getdiyi hərbi baza
İranın vurduğu hərbi bazalardan biri də Eyn əl-Əsəd idi. D.Tramp 2018-ci il dekabrın 26-da həmin bazaya baş çəkmişdi.
Baza amerikalılar üçün İraqdakı hərbi mövcudluğunun simvolu sayılır.
