Azərbaycan Avtomobil Yolları Dövlət Agentliyi tərəfindən Abşeronun Xırdalan şəhəri, Mehdi Hüseynzadə küçəsində yollar yenidən qurulur. Reportyor.info-nun məlumatına görə, Xırdalanda bütün magistral və ara yolların asfaltlanması işləri həyata keçirilir. M.Hüseynzadə küçəsində də bu işlərə başlanıb. Sakinlər tərəfindən sevinclə qarşılanan bu abadlıq işləri xüsusən nəqliyyatın hərəkətini yaxşılaşdıracaq.
Qeyd edək ki, prezident İlham Əliyev “Xırdalan şəhərində avtomobil yollarının əsaslı təmiri ilə bağlı tədbirlər haqqında” sərəncam imzalayıb. Sərəncama əsasən, Xırdalan şəhərində ümumi uzunluğu 5,1 kilometr olan avtomobil yollarının əsaslı təmiri məqsədilə Azərbaycan Respublikasının 2019-cu il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Avtomobil Yolları Dövlət Agentliyinə 3,9 milyon manat ayrılıb.
