Ölkə yayın qızmarında ağrılı proseslərdən keçir. Bu hadisələrin vitrinində siyasi-ictimai məsələlər bərq vursa da, daha alt qatında sosial bəlalar dayanır.
Bu qaynar havalarda Azərbaycan gündəmini enerji böhranı, Gəncə terroru, mediadakı məlum olaylar zəbt etsə də, xalq üçün ən mühüm olanı bahalaşmadır.
Reportyor.İnfo-nun yazdığına görə, əhaliyə ən ciddi ziyan nəqliyyatdakı qiymət artımı oldu.
Hökumət rəsmiləri, parlament tezliklə Tarif Şurasının mürtəce qərarı olan bahalaşmanı unutdurmağa çalışır.
Xalq üçün nə Gəncə hadisələri, nə də mətbuatdakı daxili çəkişmələr maraqlıdır. Əhali gündəlik həyatında onu təqib edən problemlərdən cana doyub.
Hökumətin biət edən qurumu olan Tarif Şurası isə anti-xalq addım ataraq, prezidentin bahalaşmaya qarşı siyasətini sabotaj edərək metroda və avtobusda qiymətləri qaldırdı.
Bu, xalqın yarasına duz tökmək, problemlərini xirtdəyə qədər çatdırmaq, dövlətin iqtisadi siyasətinə xəyanətdir.
Çünki heç bir maliyyə prosesləri getmədiyi halda, inflyasiya, manatın devalvasiyası olmadığı zamanda, tələbələrin yeni tədris ilinə gəlməyinə ay yarım qalmış belə mürtəce bahalaşmaya getmək Tarif Şurasındakı başbilənlərin təxribatıdır.
Onlar görünür ki, Gəncə hadisələri, enerji fəlakəti yenicə soyumağa başlamış, cəmiyyəti qızışdırmaq üçün təzə provokativ siyasət yürüdürlər. Bu, prezidentə iqtisadi şantajdır.
Üstəlik, belə həssas zamanda, oktyabrda ölkəmizə qarşı təxribatların ola biləcəyi haqda iqtidar deputatlarının açıqlamaları gəldiyi vaxtda xalq ayağa qaldırılır.
Hakimiyyət yetkililəri dəfələrlə qeyd ediblər ki, xarici qüvvələr ölkədə sosial zülmün olduğu görüntüsü yaradaraq xalqı tərpətməyə, qarışıqlıq salmağa çalışırlar.
Elə Gəncə icra başçısına sui-qəsdin də sosial zülmə etiraz olaraq törədildiyi haqda səslənən fikirlərə iqtidar nümayəndələri sərt etiraz bildirmişdilər.
Bu baxımdan sual doğurur ki, Tarif Şurası hansı güclərlə əlbirdir, hansı dairələrin “dəyirmanına su tökür”, hansı mərkəzlər üçün zəmin yaradır ki, bu hadisələrdən çox keçməmiş ictimai nəqliyyatda gediş haqlarını qaldırır?!
Nəzərə almaq lazımdır ki, metro və marşrutdan əhalinin kasıb, aztəminatlı təbəqəsi, tələbələr, fəhlələr istifadə edirlər.
Bəs, anti-xalq, anti-hakimiyyət olan Tarif Şurası niyə sui-istifadə etməkdədir? Nə üçün heç bir iqtisadi hadisə olmayan vaxtda gediş haqları 30 qəpiyə qaldırılıb? Bu qərardan öncə əmək haqları artırılıbmı? Hər halda normal ölkələrdə maaş qalxır, sonra qiymət…
Reportyor.İnfo-nun yazdığına görə, Tarif Şurasının “bahalaşma şurası” olduğu çoxdan bəllidir. Bu əcaib qurumun indiyə qədər qiymətlərdə ucuzlaşma qərarı verdiyi olmayıb.
Sanki belə bir təşkilatın işçilərinin missiyası hər ay maaş almaq, lazım gələndə bahalama qərarı verməkdir.
Görünür, Tarif Şurasında işləyənlər metro və marşrutdan istifadə etmirlər, lüks avtomobillər sahibidirlər, yaxud da ildə iki dəfə mürtəce hərəkətləri ilə gündəmə gələn bu Şurada işləyənlərin maaşı çox yüksəkdir.
Əks təqdirdə, xalqın sosial şəraiti nəzərə alınardı. Ən azı vicdan, insaf deyilən keyfiyyətlər də var…
Ən dəhşətlisi və ikrah hissi doğuran budur ki, yeni maaşları artan deputatlar da bu şər aparatı olan Tarif Şurasının qərarına etiraz etmirlər. Niyə etsinlər ki?!
Bu il maaşını artırmağa müvəffəq olan millətin təyinatlı vəkilləri indi də tətil pulunu alaraq cənnət guşələrində istirahətə yollanıblar.
millətin deyil, hakimiyyətin vəkilləri olan təyinatlı deputatlara olan nifrətin köklü səbəbləri var.
İlk növbədə onlar geridə qalan bu üç il ərzində xalqın əleyhinə olan bütün mürtəce qanunlara “hə” deyiblər.
Həmin qanunlar insan azadlıqlarının məhdudlaşdırılması, cərimələrin sərtləşdirilməsi, biznes mühitinin çətinləşdirilməsinə xidmət edib.
İkincisi, deputatlar parlamentdə əhalinin problemlərini qaldırmırlar, seçiciləri ilə görüşlər keçirmirlər, onlara edilən müraciətlər qulaqardı edilir.
Üçüncüsü, 125 deputatın yarıdan çox MM-də çıxışlar etmir, əksəriyyəti biznes fəaliyyəti olan iş adamlarıdırlar və “ağzına su alıb” otururlar.
Dördüncüsü, ayrı-ayrı deputatlar çıxışlarında xalqı, qaziləri, şəhid ailələrini, müəllimləri, cəmiyyətin müxtəlif zümrələrini təhqir ediblər. Sonra üzr istəyiblər.
Bütövlükdə cəmiyyətin atomlaşması və nüvə effekti verən etirazları yaranmış böhranın fəsadlarıdır. İqtidarın fiqur dəyişiklikləri sistemdəki dərin yaraları, irinləri hələ ki təmizləyə bilmir.
Hakimiyyət seçkidən əvvəl verdiyi vədlərin demək olar ki, heç birinə əməl etmədi. Yalnız fiqurların dəyişikliyi ilə kosmetik vitrin yaratmağa müvəffəq oldular.
Odur ki, sistem cəmiyyətdə insan dərisinin ən dərin qatlarına iynələrini yeritməkdədir. Bu, yatmış sinirlərin epizodik oyanışı effekti verir – məqsəd təzyiq altında saxlamaqdır…
REPORTYOR.info
