“Pandemiya dövründə bir çox qüsurların şahidi olduq. İctimai nəqliyyatın alternativ növlərinin olmaması – tramvay, trolleybus kimi daha əlverişli nəqliyyat vasitələrinin yoxluğu bizə çox pis təsir göstərdi. Metro bağlı olduğu üçün də avtobuslar yükləndi”.
Bu sözləri “Müsavat tv”nin canlı yayımında nəqliyyat üzrə ekspert Elməddin Muradlı səsləndirib. Ekspert fikirlərini əsaslandırmaq üçün müvafiq rəqəmlərə toxunub:
“Bu gün Bakıda 2100 avtobus var. Tutaq ki, müəyyən səbəblərə görə 100-ü xəttə buraxılmasa belə, onlardan iki mini çalışır. Amma təhlillər göstərir ki, metro işlədiyi dövrdə Bakı şəhərinə 2500-2600 avtobus lazım idi. Hələ metro işləyə-işləyə…
Bakı şəhərində gündəlik təxminən 2 milyon 200 min sərnişin (pandemiya olmayan dövrdə) dövr edir. Hazırda da sərnişin sayı iki milyona yaxındır. Metronun da sərnişindaşıma yükü 1 milyon 500 mini üstələyir. İndi təsəvvür edin ki, avtobusların sayı 2100 olaraq qalır və metro da bağlıdır. Metropolitenin də milyon yarımlıq sərnişin yükü avtobusların üzərinə düşür”.
Nəqliyyat ekspertinin sözlərinə görə, avtobuslar heç metro çalışanda, karantindən əvvəl də sərnişinlərin rahat hərəkətini tam təmin edə bilmirdi.
“Cənab Prezident tapşırıb və əslində Dövlət Proqramı da var ki, ictimai nəqliyyatın alternativ növləri də (trolleybus, tramvay) yaradılsın. Çox təəssüf ki, keçmiş Bakı merləri Rafael Allahverdiyev və Hacıbala Abutalıbov bu sistemi məqsədli şəkildə məhv etdilər.
Tramvay və trolleybus xətlərinin misini, dəmirini satdılar. Yol tiintisi və şəhərsalmanı da elə bərbad vəziyyətə saldılar ki, indi istəsək də o yolları çəkmək bizim üçün ağır fəsadlar törədəcək. Yol şəbəkəsi daralacaq və s.
Nümunə üçün, adi avtobus zolağı hazırlananda bir çox küçələrdə problemlər yaranır. Avtobus zolağı boş qalır və 5 dəqiqədən bir oradan avtobus keçir. Amma 5 dəqiqə ərzində həmin zolaqla minlərlə avtomobil hərəkət edə bilər. Belə bir müqayisə yaranır: avtobusdakı 70-80 nəfərə görə avtomobillərdə olan 1500 insan gözləməli olur”.
Elməddin Muradlı bəzi avtobus zolaqlarının da tam olmadığını deyərək Bakının nəqliyyat infrastrukturundakı əsas problemləri köhnə rüşvətxor məmurların pula görə hər tikinti işinə icazə verməkləri ilə izah edib.
“Metroya qayıtsaq, Tağı Əhmədov metro şəbəkəsini məhv edib. Metronun bu gün işləməməsinin səbəbkarı QSC-nin eks rəhbərinin fəaliyyətidir. Hazırda metropoliten bəyan edir ki; biz fəaliyyətə hazırıq, icazəni Operativ Qərargah verməlidir.
Bir metro qatarı təxminən 5 vaqondan ibarətdir, 1 vaqon isə 2-3 avtobus yükünü çəkə bilir. 5 vaqon isə 10-15 avtobusdan artıq sərnişin daşıya bilir. Həmçinin metroda səfər müddəti daha qısadır.
Avtobusda qucaq-qucağa gedəndə yoluxma riski çox olur, yoxsa getdiyin ünvana metro ilə daha tez çatanda? Bunu Operativ Qərargahda oturanlar da bilir, əgər məlumatsızdırlarsa neçə aydır ki, deyirik”.
Nəqliyyat eksperti metronun hansısa terror təhlükəsinə görə açılmadığı fikiri ilə də razılaşmayıb və bunun qarşısını almaq üçün orada kifayət qədər hüquq-mühafizə orqanı əməkdaşlarının olduğunu dilə gətirib. \Bizim.Media
