Yeni Azərbaycan Partiyasının qurultayında “köhnə qvardiya” demək olar ki, rəhbərlikdən kənarlaşdırıldı. Əslində köhnə komandanın uzaqlaşdırılmasına çoxdan başlanmışdı. Proses 2018-in prezident seçkisindən sonra onların dövlət və hökumət vəzifələrindən uzaqlaşdırılması ilə start götürmüşdü. Köhnələrin başında Ramiz Mehdiyev idi. Müqavimət göstərdi, dirəndi, amma məğlub oldu. Məsələ bitdi. Rusiyanın da bundan sonra ixtiyar yaşında olan və rıçaqlardan məhrum edilən şəxsin arxasında dayanması ehtimalı yoxdur.
Artıq hökumət kimi YAP da yeniləndi. Bəs köhnələrin gedişi, yenilərin gəlişi iqtidar düşərgəsinə nə qazandırır?
Azərbaycan Naminə Alyans Partiyasının sədri Abutalıb Səmədov “Yeni Müsavat”a bildirdi ki, qurultayın keçirilməsində əsas məqsəd partiyanı nüfuzdan salan “köhnələri” yola salmaqdan və hakim qüvvəyə yeni nəfəs verəcək şəxsiyyətləri rəhbərliyə gətirməkdən ibarət idi. Etiraf olunmalıdır ki, bu iş partiyanın rəhbərliyi tərəfindən yüksək səviyyədə, son dərəcə müdrikliklə icra olundu: “YAP-ın rəhbər orqanı olan idarə heyətinə yeni siyasətçilər seçildi. ”Köhnələrin” bir hissəsi partiyanın idarə olunmasından tamamilə uzaqlaşdırıldı. Bəziləri yeni yaradılan Veteranlar Şurasına seçildilər və qurultayı tərk edərkən bu seçimi fəxrlə elan etmələri bizi düşündürməyə bilməz. Dövlətdə ən yüksək vəzifələrdə uzun müddət “fəaliyyət göstərən” kəslərin sevincək “mən veteranlar şurasına seçildim” bəyanatı vermələri bu kadr dəyişikliklərinin nə qədər vaxtında edildiyini göstərdi. Təbii ki, Veteranlar Şurasının YAP-ın idarə olunması sahəsində rolu o qədər də böyük deyil və daha çox partiya quruculuğunda, dövlət qarşısında xidmətləri olan insanları partiya ətrafında saxlamaq, onların biliyindən, təcrübəsindən yararlanmaq üçün yaradılmış bir qurumdur. Bu baxımdan, şuraya bir müddət kənarda qalan dəyərli insanların seçilməsi bizləri sevindirməyə bilməz”.
A.Səmədov hesab edir ki, köhnələrin, xüsusilə partiyanın nüfuzuna zərbə vuran kəslərin rəhbərlikdən uzaqlaşdırılması öz müsbət nəticələrini artıq göstərməkdədir: “Bu addım həm partiya sıralarında olan yüzminlərlə üzvün ümidlərinin artmasına, yeni enerji ilə fəaliyyət göstərmələrinə, həm də müttəfiq partiyalarla əməkdaşlığın yeni, daha yüksək səviyyəyə qaldırılmasına imkan verə bilər.
Şübhəsiz ki, əsas yük idarə heyətinin yeni seçilən üzvlərinin üzərinə düşəcək. Onların dövlət başçısının və partiyanın yeritdiyi siyasəti geniş xalq kütlələrinə çatdırması son dərəcə vacibdir. Bundan sonra hamımız rəhbərliyə gələn yeni siyasətçilər nəslinin çıxışlarını, debatlarda iştirakını maraqla izləyəcəyik. İnanıram ki, böyük etimada layiq görülmüş şəxslər tərəfdarlarını məyus etməyəcək, xüsusilə debatlar zamanı nümayiş etdirdikləri səviyyə ilə hamımızı qürurlandıracaqlar. Bununla da ilk növbədə təmsil olunduqları partiyanın nüfuzunu daha da artırmış olacaqlar”.
