Əhalinin aztəminatlı və kasıb təbəqəsi üçün mövsümi meyvə-tərəvəz məhsulları əlçatmaz olaraq qalmaqdadır.
Reportyor.info-nun əməkdaşının bazarlarda, marketlərdə apardığı müşahidələrə görə, mövsüm dövrü olmasına rəğmən bir sıra kənd təsərrüfatı məhsullarının qiyməti yüksək olaraq qalmaqdadır.
Bu da əhalinin böyük hissəsi üçün baha və əldə edilməsi çətindir. Əməkdaşımız müşahidələrinə görə, insanlar mövsümi meyvə-tərəvəzi tamarzı qalaraq alırlar, yəni hər məhsuldan yarım kilo, 200 qram…
Məsələn, hazırda adi bibər – 2.65 AZN , armud – 5 AZN, xurma – 3.20 AZN, portağal – 1.79 AZN, alma – 1.19 AZN civarında satışdadır. Bu məhsulların qiyməti ayrı-ayrı marketlərdə, bazarlarda yuxarı-aşağı dəyişir.
Həmçinin, ən ucuz soğan – 0.65 AZN, kartof – 0.60 AZN-dən başlayır. Amma normal və keyfiyyətli kartof-soğan daha baha qiymətə satışdadır.
Uşaqların sevimli meyvələri olan kivi 2 AZN-dən aşağı deyil, banan 2.65 manatadır. Ümumiyyətlə, bu meyvələrin illərdir qiyməti aşağı düşmür. Halbuki, 1-1,50 AZN olmalıydı.
Üstəlik, ixrac olunan meyvə-tərəvəzin dəyəri 12%, həcmi isə 8,3% azalıb. O zaman bazarlarda məhsul bol, qiymət ucuz olmalıydı. Bəs niyə qiymətlər “od tutub yanır”?
Bu istiqamətdə Kənd Təsərrüfatı Nazirliyi hansı işləri həyata keçirir? Aqrar sektora innovativ siyasət gətirməyi hədəfləyən nazir İnam Kərimov KTN rəhbəri postunda əvvəlki nazirlərdən fərqli olaraq nəyə nail ola bilib?
Məlumata görə, bahalaşmanın əsas səbəbi monopoliya siyasətidir. Ölkədə ayrı-ayrı yüksək çinli məmurların inhisarında olan bu məhsullar idxalın ucbatından od qiymətinə satılır.
Yerli məhsullar da qeyri-ixtiyarı olaraq xaricdən gətirilən mallarla rəqabətdə bahalaşır, vətəndaşların mövsümi meyvə almağa imkanı çatmır. Bu, Kənd Təsərrüfatı Nazirliyinin heç bir aqrar, tarif proqramı olmadığını isbat etməkdədir.
İ.Kərimov yay mövsümündə də meyvə-tərəvəzin ən baha olduğu zamanın naziri kimi tarixdə qaldı.
İslahatçı nazirin dönəmində çox şükür, “islahat” sayəsində gilas, albalı, ərikdən də məhrum edildik. Ən pisi nazirin heç bir şərh verməməsi, nazirliyin bahalaşma barədə susqunluğudur.
Gülay
