Sosial şəbəkələrin gündəmində iki hadisə daha çox müzakirə olunur, şərhlər, rəylər irəli sürülür, fikirlər bildirilir, reaksiyalar verilir.
Onlardan biri apreldə keçiriləcək prezident seçkiləri və növbədənkənar olmasının səbəbləridirsə, digəri Abşeron rayon icra başçısı İradə Gülməmmədovanın müharibə əlilini döydürməsi barədə video çıxışdır.
Reportyor.info xəbər verir ki , Feysbuk istifadəçiləri seçkilərin siyasi aspektlərini və xarici təsirlərini müzakirə edərkən, müharibə qazisinin sosial həyatının ağırlığını, milyonçu məmurun onu incitməsinin dəhşətlərini də qeyd edirlər.
Ölkədə sosial bəlalar, partlayışlar həmişə siyasi kataklizmlərə gətirib çıxarır. Sosial böhranın sonu siyasi böhrana səbəb olur.
Ancaq belə görünür ki, Abşeron rayonuna rəhbərlik edən İ.Gülməmmədova siyasi fəlsəfə tarixini çox zəif mənimsəyib və onun tibbi bilikləri də o qədər güclü deyil ki, bu hesablamaları aparsın.
Yəni, məmur özbaşınalığı və laqeydliyindən bezən vətəndaş sosial partlayışa səbəb olacaq addım ata bilər, yekunda siyasi hərəkata çevrilər.
2-ci qrup Qarabağ əlili, evsiz-eşiksiz, səfalət içində yaşayan Səyyaf Bayramovun vəhşicəsinə döyülməsi isə İ.Gülməmmədova üçün adi hal idi. Ola bilsin ki, bu aktda icra başçısı başağrısı ilə qarşılaşmadı.
Lakin zəmanət verilmir ki, növbəti xoşagəlməz özbaşınalıq nəyə gətirib çıxarar. Necə ki, Quba və İsmayıllı dərsləri yaxın keçmişimizdən bizi hər zaman təqib edir.
Azərbaycanda yenə seçki ilidir və məmurlar məsuliyyətsiz davranaraq, siyasi hakimiyyətin başına oyun gətirəcəklərini fikirləşmədən laqeyd addımlar atırlar.
Onlardan birini Abşeronda “firon”luq edən icra hakimi gerçəkləşdirir və sosial gərginliyə imza atır. Odur ki, sosial şəbəkələrin müzakirəsinə çıxır.
Feysbuk isə indi ən böyük media hesab olunur və hökumət rəsmiləri də virtualdakı müzakirələrə reaksiya verirlər.
Və nəticədə Qarabağ qazisi və əlili video müsahibəsində İ.Gülməmmədovanın əmri ilə Abşeron polisinə çağrıldığını və şöbənin qarşısında mülki geyimli iki polis tərəfindən qanına qəltan edildiyini söyləyir.
Onun sözlərinə görə, kanteyneri dağıdılıb, yaşamağa bir sığınacağı yoxdur və evsiz-eşiksiz qalması ilə bağlı etdiyi müraciətin axırında icra başçısı tərəfindən cəzalandırılıb.
“Bütün qabırğalarıma zərbələr vurublar. Mənə deyirdilər ki, sənə yerin altında torpaq verəcəyik, üstündə sənə yer yoxdur. Belə insanlıq olarmı?
Bunlar erməniyə yaraşan hərəkətlərdir. Ancaq Qarabağda döyüşən adama belə münasibət göstərirlər. Onıarın istəyi məni aradan götürüb öldürmək olub.
Bunu da Abşeronun icra başçısının əmri ilə ediblər. Mənim müraciətimə cavab olaraq döyülməyimə tapşırıq verib.
Mən vətən uğrunda döyüşəndə Abşeronun icra başçısının xəbəri olmayıb və bu gün bu torpağın üstündə rahat gəzə bilir. Çünki biz bu ölkəni qorumuşuq”.
Qarabağ əlili qeyd edib ki, əgər ona yaşamağa bu ölkədə yer yoxdursa, prezident vətəndaşlıqdan xaric etsin.
Reportyor.info xatırladır ki , İ.Gülməmmədova hər şeydən əvvəl bir anadır, övlad, nəvə sahibidir.
Qadınlar kişilərlə müqayisədə daha humanist, ürəyiyumşaq, xeyirxah və nəzakətli olurlar. Onlar kimsəsiz, səfalət içində, ac-susuz, yuvasız görəndə yardım edirlər.
Üstəlik, söhbət Qarabağ qazisindən gedirsə…O bu vətən üçün canını verib, sağlamlığını itirib, İradə xanımın və bizim rahat yaşamağımız üçün əlində silah düşmənə qarşı savaşıb.
Amma fikirləşməyib ki, dövlət məmurları qarşılığında ona “mükafat” olaraq yumruq, təpik yedirəcəklər. Dövlət onu yuva, iş, rahatlıqla təmin etməliydi, əlində gəzdirməliydi.
Əfsus ki, xanım icra başçısı Qarabağ əlilinin əlindən tutmaq, ona yardım etmək, isti geyim, yemək, qışın sazağında yaşamağa sığınacaq təşkil etməkdənsə, döyülməsinə əmr verir. Qarabağ əlili video çıxışında qeyd edir ki, artıq ona düşmən ölkə olan ermənistandan təklif gəlib. Belə ki ,öz ölkəsində bir qarın çörəyə onu möhtac qalan Qarabağ əlilini ermənistan söz verib ki, qarşılayacaq üstəlik onu evlə də, təmin etməyə hazırdır.
İ.Gülməmmədova bu cür sosial gərginliyə səbəb olan, Feysbukda müzakirələrə aparan hərəkəti ilə rayonu “barıt çəlləyi”nə döndərməkdədir və heç də yaxşı perspektiv vəd etmir.
Ümumiyyətlə, böyük gözləntilər vardı: xanım icra başçısı kişi həmkarlarından fərqlənəcək, daha humanist, ana və qadın ürəyi ilə Abşerona yanaşacaq, insanların və rayonun problemlərinə isti münasibət sərgiləyəcək.
O, I vitse-prezident Mehriban Əliyevanın fəaliyyətindən, gördüyü işlərdən nümunə götürmək əvəzinə Abşeronu “cəhənnəm yuvası”na döndərir.Nəticə isə bərbad artıq məncə həyəcan siqnalı çalınmalı və İradə Gülməmmədova haqqında ciddi tədbir görülməlidir.
Reportyor.info
